თანამედროვე სამაგიდო თამაშების პოპულარიზაციის მიზნით, თელავის მუნიციპალიტეტის მერიისა და თელავის სამაგიდო თამაშების კლუბის ერთობლივი პროექტის ფარგლებში, მუნიციპალიტეტის სოფლებში გასვლითი შეხვედრები დაიწყო.


მერიის ინფორმაციით, პირველ ეტაპზე, პროექტის ფარგლებში იგეგმება თელავის მუნიციპალიტეტის 8 სოფელში სამაგიდო თამაშების კლუბის ჩამოყალიბება და მათი სხვადასხვა თანამედროვე თამაშით მომარაგება.

„ორგანიზატორების ინფორმაციით, სხვადასხვა შინაარსის და დატვირთვის ინტელექტუალური თამაშები ახალგაზრდების განვითარებას ( ყურადღების კონცენტრაცია, სტრესის დაძლევა, სტრატეგიული დაგეგმვისა და ანალიზის უნარი ) უწყობს ხელს.
სამაგიდო თამაშების ტურნირი 11 მარტს დაიწყო და 24 ივნისს დასრულდება.
დაინტერესებულ პირებს დეტალური ინფორმაციის მიღება თელავის მუნიციპალიტეტის მერიის კულტურის სამსახურში შეუძლიათ.“ - ვკითხულობთ თელავის მუნიციპალიტეტის მერიის მიერ გავრცელებულ ინფორმაციაში.

თამაშების განრიგი ასეთია:

18 მარტს, 25 მარტს და 1 აპრილს სამაგიდო თამაშები ფშაველსა და ართანაში გაიმართება.
8 აპრილს, 15 აპრილს, 22 აპრილს და 29 აპრილს თამაშები ნაფარეულსა და კისისხევში ჩატარდება.
6 მაისს, 13 მაისს, 20 მაისს და 27 მაისს თამაშებს ქვემო ხოდაშენი და კონდოლი უმასპინძლებს.
3 ივნისს, 10 ივნისს, 17 ივნისს და 24 ივნისს სამაგიდო თამაშები იყალთოსა და ვარდისუბანში გაიმართება.