კანონში შეტანილი ცვლილებების მიხედვით, 2023-2024 სასწავლო წელს პირველ კლასში სწავლა დასაშვებია იმ ბავშვებისთვისაც, რომლებსაც 6 წელი 1-ელ ნოემბრამდე შეუსრულდებათ. თუმცა, საქართველოს განათლებისა და მეცნიერების სამინისტროში აცხადებენ, რომ ამ ბავშვებს შესაძლებლობა ექნებათ, საკუთარი სურვილისამებრ, დარჩნენ საბავშვო ბაღში ან სწავლა სკოლაში გააგრძელონ.

„ზოგადი განათლების შესახებ კანონში“ შეტანილი ცვლილებების თანახმად, 2023-2024 სასწავლო წელს პირველ კლასში დარეგისტრირების შესაძლებლობა აქვთ ბავშვებს, რომლებსაც 6 წელი 1-ელ ნოემბრამდე შეუსრულდებათ. ბავშვის მზაობისა და მისი საუკეთესო ინტერესების გათვალისწინებით, 16 სექტემბრიდან 1-ელ ნოემბრამდე დაბადებულ პირებს, შესაძლებლობა ექნებათ, საკუთარი სურვილის შესაბამისად, დარჩნენ სკოლამდელი აღზრდის დაწესებულებებში ან სწავლა სკოლაში გააგრძელონ.“ - აღნიშნულია სამინისტროს მიერ გავრცელებულ ინფორმაციაში.

კანონში შესული ცვილებებიდან გამომდინარე, შეიცვალა პირველკლასელთა რეგისტრაციის ვადებიც:

• მეორე ეტაპზე რეგისტრაცია 2023 წლის 19 მაისის ჩათვლით იქნება შესაძლებელი და სკოლაში დარეგისტრირდებიან ის ბავშვები, რომელთა:

✔ და-ძმაც სწავლობს სასურველ სკოლაში;
✔ მშობელი/მეურვე/მზრუნველი სასურველი საჯარო სკოლის თანამშრომელია;
✔ ოჯახიდან ერთდროულად ორი ან მეტი ბავშვი შედის პირველ კლასში.

• 2023 წლის 22-23 მაისს დამატებით განხორციელდება რეგისტრაცია სპეციალური საგანმანათლებლო საჭიროების მქონე ბავშვებისთვის, რომლებიც რეგისტრაციის პირველი ეტაპისთვის თავდაპირველად განსაზღვრულ ვადებში ვერ დარეგისტრირდნენ სკოლებში.
• III ეტაპი – საყოველთაო რეგისტრაცია 8 ივნისს დაიწყება და 23 ივნისის ჩათვლით გაგრძელდება.
• IV ეტაპი – 17 ივლისიდან 28 ივლისის ჩათვლით სკოლებში განხორციელდება. ამ ეტაპზე დარჩენილ თავისუფალ ადგილებზე ან წინა ეტაპებზე გამოთავისუფლებულ ადგილებზე იმ მოსწავლეების რეგისტრაცია მოხდება, რომლებიც ვერ დარეგისტრირდნენ I, II და III ეტაპებზე, ან სურთ რეგისტრაციის შეცვლა.