შინაგან საქმეთა სამინისტროს ინფორმაციით, პარლამენტის მიმდებარე ტერიტორიაზე რუსული კანონის საწინააღმდეგო საპროტესტო აქციაზე 13 მომიტინგეა დაკავებული. უწყების მტკიცებით, საპროტესტო აქცია გასცდა მშვიდობიანი პროტესტის ფორმებს, რის გამოც დაიწყო დაკავებები.

"იმისთვის, რომ დეპუტატებსა და პარლამენტის აპარატის თანამშრომლებს საპარლამენტო ორგანოში უსაფრთხო გადაადგილების შესაძლებლობა ჰქონოდათ, შინაგან საქმეთა სამინისტრომ მიიღო გადაწყვეტილება, რომ გაეთავისუფლებინა პარლამენტის შესასვლელები. პარალელურად, აქციის მონაწილეებს, რუსთაველის გამზირსა და ბ. ჭიჭინაძის ქუჩაზე, ჰქონდათ შესაძლებლობა მშვიდ ვითარებაში გამოეხატათ პროტესტი.

პარლამენტში მიმდინარე კენჭისყრის დასრულების შემდეგ, აქციის მონაწილეებმა დაიწყეს, რუსთაველის გამზირზე მდებარე საკანონმდებლო ორგანოს შესასვლელში მოწყობილი რკინის დამცავი ღობის მიზანმიმართული დაზიანება და შედეგად მოახერხეს პარლამენტის ტერიტორიაზე შეღწევა. გარდა ამისა, პარლამენტის შენობაზე საღებავებით გააკეთეს სხვადასხვა სახის წარწერები.

შესაბამისად, საკანონმდებლო ორგანოს წინ შეკრებილი აქციის მონაწილეების პროტესტი, სრულად გასცდა შეკრებისა და მანიფესტაციის კანონით დადგენილ ფარგლებს და მიიღო ძალადობრივი ხასიათი" - ვკითხულობთ განცხადებაში.

ამ დროისთვის, ცნობილია, რომ დაკავებულებს შორის არიან 2023 წლის საპროტესტო აქციების მონაწილე ლაზარე გრიგორიადისი და ანტისაოკუპაციო მოძრაობის წარმომადგენელი, დავით ქაცარავა, რომელიც სასტიკად არის ნაცემი. იგი ინგოროყვას კლინიკაშია გადაყვანილი.

"დიახ, მეგობრებო, ლაზარე ისევ დაიჭირეს და ჩვენც მიგვაყოლებენ, თუ ეს დამპალი რეჟიმი არ გაუყენეთ ციმბირის გზას!" - დაწერა ლაზარე გრიგორიადისის დედამ შვილის დაკავების შემდეგ ფეისბუკ-გვერდზე.



დავით ქაცარავას ჯანმრთელობის მძიმე მდგომარეობის შესახებ საუბრობს მისი ცოლი, სოფო ხაჭაპურიძე.

„გადაიყვანეს ინგოროყვას კლინიკაში, დაკავებულია. არის სასტიკად ნაცემი თავის არეში, ყბა აქვს გატეხილი, ყვრიმალის ძველი აქვს მოტეხილი, თვალი ჩასიებული. სახე და თავი აქვს დეფორმირებული ფაქტობრივად, ძალიან მიზანმიმართულად ძალიან ბევრმა ადამიანმა ურტყა თავში განსაკუთრებულად,“ — განაცხადა “ნეტგაზეთთან” საუბარში სოფო ხაჭაპურიძემ.



პარლამენტის მიმდებარე ტერიტორიაზე მშვიდობიანი მომიტინგეების დარბევა და დაკავებების სერია მას შემდეგ დაიწყო, რაც პარლამენტმა რუსული კანონი მესამე, საბოლოო მოსმენით მიიღო. 84 მომხრე, 30 წინააღმდეგი, ასეთია კენჭისყრის შედეგები.

"კი ევროპას, არა რუსულ კანონს!" ფართომასშტაბიანი საპროტესტო აქცია ამ წუთებშიც მიმდინარეობს.