თბილისი-ბაკურციხე-ლაგოდეხის საავტომობილო გზის სამშენებლო სამუშაოები იწყება
საავტომობილო გზების დეპარტამენტის ინფორმაციით,
თბილისი-ბაკურციხე-ლაგოდეხის საავტომობილო გზის შემადგენელი
საგარეჯო-ბადიაურის 17 კმ-იანი მონაკვეთის სამშენებლო სამუშაოები
იწყება.
მათივე თქმით, პროექტით გათვალისწინებულია 4-ზოლიანი ცემენტ-ბეტონის
გარე განათების სისტემით აღჭურვილი ჩქაროსნული გზის მშენებლობა, რაც,
საერთაშორისო საგზაო უსაფრთხოების ნორმების დაცვით, 110 კმ საათში
გადაადგილების საშუალებას იძლევა.
„საგარეჯო-ბადიაურის საავტომობილო გზის მონაკვეთი კახეთის ახალი
მაგისტრალური გზის შემადგენელი ნაწილია, რომლის მშენებლობის
ხელშეკრულებასაც საქართველოს რეგიონული განვითარებისა და
ინფრასტრუქტურის სამინისტროს საავტომობილო გზების დეპარტამენტი
უახლოეს დღეებში გააფორმებს,“-აცხადებენ უწყებაში.
ასევე, სამუშაოები მიმდინარეობს ბაკურციხე-წნორის შემოვლით, 16.6
კმ-იან გზაზე, რომელიც გვერდს აუვლის მჭიდროდ დასახლებულ წნორსა და 6
მიმდებარე სოფელს.
ცნობისთვის, პროექტი ევროპის რეკონსტრუქციისა და განვითარების ბანკის
(EBRD) ფინანსური მხარდაჭერით ხორციელდება და მისი საერთო ღირებულება
276.7 მილიონი ლარია. სამუშაოებს ტენდერში გამარჯვებული კომპანია 2025
წელს დაასრულებს.
მასალის გამოყენების პირობები