გურჯაანში 15 ივნისს მოსული ძლიერი წვიმის შედეგად დაზიანებულ წმინდა ნინოსა და სარაჯიშვილის ქუჩებს რეაბილიტაცია ჩაუტარდება. უკვე გამოვლენილია ტენდერში გამარჯვებული კომპანია.

საქართველოს საავტომობილო გზების დეპარტამენტმა ტენდერი შიდასახელმწიფოებრივი მნიშვნელობის გურჯაანი-ჭაბუკიანი-აფენი-კაბალის საავტომობილო გზის 5 კილომეტრიანი მონაკვეთის სარეაბილიტაციო სამუშაოების განსახორციელებად 6 113 436 ლარზე გამოაცხადა. გამარჯვებულია კომპანია შპს „ქეი ქონსთრაქშენი“, რომელიც ერთადერთი მონაწილე იყო. ამ დროისთვის მიმდინარეობს ხელშეკრულების გაფორმება.

ტექნიკური დოკუმენტაციის მიხედვით, შესასრულებელია შემდეგი ტიპის სამუშაოები:

• მოსამზადებელი სამუშაოები;
• მიწის ვაკისის მოწყობა;
• საგზაო სამოსის მოწყობა;
• სახიდე გადასასვლელის მოწყობა და არსებულის რეაბილიტაცია;
• რკინაბეტონის კიუვეტების მოწყობა;
• მიერთებების და ეზოში შესასვლელების შეკეთება;
• ტროტუარების მოწყობა;
• წრისა და გამყოფი კუნძულების მოწყობა;
• განათების ბოძის მოწყობა;
• გზის კუთვნილება და მოწყობილობა.

სამუშაოები უახლოეს პერიოდში დაიწყება. მისი ღირებულება ტენდერის მიხედვით, 5 740 517 ლარს შეადგენს.

აქვე შეგახსენებთ, რომ ჯერ კიდევ დაზიანებულია გურჯაანში მთავარ მაგისტრალზე არსებული ხიდი, რომელიც პრობლემებს უქმნის როგორც ფეხით მოსიარულეებს, ასევე მძღოლებსაც.