ღვინის კომპანიები და ღვინის ეროვნული სააგენტო ვარაუდობენ, რომ ყურძნის ფასი გასული წლის მსგავსი იქნება. გლეხების თქმით, 1 კგ რქაწითელი 1 ლარზე, ხოლო საფერავი 1.50-ზე ნაკლები არ უნდა ღირდეს, წინააღმდეგ შემთხვევაში მოვლის ხარჯს ვერ დაფარავენ.
თელაველი თემურ გურგენიძე ვარაუდობს, რომ წელს 20 ტონა ყურძენს დაკრეფს. მისივე თქმით, მთელი ოჯახი ამ მოსავალს ელოდება.

„რქაწითელიც მაქვს და საფერავიც. თუ სეტყვა არ მოვიდა, მთლიანობაში დაახლოებით 20 ტონას ჩავაბარებ. მოვლა ძვირი ჯდება, ამიტომ რქაწითელი 1 ლარზე იაფი არ უნდა ღირდეს, საფერავი კი -1.50-ზე. მარტო ხომ ვერ მოვუვლი ამხელა ვენახს, იქ წამლის ფულია საჭირო, იქ საწვავის, მუშის და მარტო ხარჯი რომ დაფაროს, არსებობაც ხომ გვინდა. იმ ანდაზისნაირად გამოდის, „თხა ვიყიდე, თხა გავყიდე, სარგებელი რა ვნახე“.

როგორც გურჯაანის მუნიციპალიტეტის სოფელ ველისციხეში მცხოვრები ზაქარია მათარაშვილი გვეუბნება, ვენახი უხარისხო შხამ-ქიმიკატების გამო დაუზიანდა. 7 ტონა მოსავალს ელოდებოდა, თუმცა ახლა 2 ტონის იმედიღა აქვს.

„ვენახი უკვე 11-ჯერ შევწამლე, თითო მოწამლა 100 ლარამდე მიჯდება. რასაც ველოდებოდი, იმის ნახევარსაც ვეღარ ავიღებ, მტევნები სულ გამხმარია. შხაქიმიკატები უხარისხო გამოდგა, თორემ როგორც შარშან, ახლაც 7 ტონას დავკრეფდი. ამბობენ, ყურძნის ფასი გასული წლის მსგავსად იქნებაო და აბა რა გამოდის. სოფელში ვცხოვრობ, მინდა ვენახი მეც მქონდეს, თორემ წვალების მეტი არაფერი მრჩება.“

მთავრობის გადაწყვეტილებით, მიმდინარე წელს სუბსიდიის სახით ერთ კილოგრამ „საფერავის“ ჯიშის ყურძენზე 20 თეთრი, ხოლო „რქაწითელზე“ 45 თეთრი გაიცემა.

Spetqri.ge დაინტერესდა რა ფასად ჩაიბარებენ ყურძენს ქარხნები, ამიტომ რამდენიმე კომპანიას დავუკავშირდით.

„ფასზე ჯერ არ ვართ ჩამოყალიბებული, ეს პირველ რიგში იმაზეა დამოკიდებული, რა შეკვეთას მოგვცემენ იმპორტიორები. ამის შესახებ დაახლოებით ერთ თვეში გვაცნობებენ. იმდენად პატარა მოთამაშეები ვართ ბაზარზე, ფასს ჩვენ ვერ დავარეგულირებთ. რაც ეღირება, იმას გადავიხდით. ღირებულება, სავარაუდოდ, გასული წლის მსგავსი იქნება, არ ველოდებით არც გაზრდას და არც შემცირებას. გასულ წელს 100 ტონა საფერავი, 60 ტონამდე რქაწითელი და მანავის მწვანე მივიღეთ. ალბათ, მიმდინარე წელსაც იგივე მოცულობას ჩავიბარებთ“,- აღნიშნა თელავის მუნიციპალიტეტის სოფელ ვარდისუბანში მდებარე „ვინივერიას“დირექტორმა ზვიად გურაშვილმა.

კომპანია „ენისელი-ბაგრატიონის“ დირექტორი სანდრო ბაგრატიონი ამბობს, რომ რასაც სახელმწიფო დაადგენს, ყურძენში იმ ფასს გადაიხდიან.
„ფასს მე ვერ გეტყვით, რასაც მთავრობა დაადგენს, ჩვენც ისე ჩავიბარებთ. სავარაუდოდ, გასული წლის ანალოგიური იქნება“.
ფასთან დაკავშირებით გადაწყვეტილება ჯერ არ მიუღია კომპანია“წინანდალი-შუმსა“ და სანიორეში მდებარე „შატო-თელავს“.

სოფლის მეურნეობის მინისტრის ოთარ დანელიას განცხადებით, მიმდინარე წელს გასულ წელთან შედარებით 2000-3000 ტონით მეტ ყურძნის მოსავალს ელოდებიან. თუმცა ღვინის ეროვნული სააგენტოს თავმჯდომარის გიორგი სამანიშვილის თქმით, გლეხებს რეალიზაციის პრობლემა არ შეექმნებათ.
„ჩვენ ვიცით დაახლოებითი მოთხოვნა კერძო სექტორიდან. მინდა აღვნიშნო, რომ მოსავალი ცოტა უფრო მეტია. როგორც შარშან, სავარაუდოდ, ჭარბი ყურძენი წელსაც იქნება და მას სახელმწიფო ჩაიბარებს. რაც შეეხება ფასს, ჩვენ არ ვადგენთ, ამას ბაზარი არეგულირებს. თუმცა, სავარაუდოდ , გასული წლის მსგავსი იქნება, სხვაობა შეიძლება იყოს ხარისხის მიხედვით . ეს არის ჩვენი წინასწარი ანალიზი, თუმცა რთველი წინაა.“

გასულ წელს რქაწითელის ფასი 70 თეთრი, ხოლო საფერავის 80 თეთრი იყო, რასაც გურჯაანში მევენახეების პროტესტი და აქციები მოჰყვა. ფერმერებმა ცენტრალური მაგისტრალი რამდენჯერმე გადაკეტეს.