სიღნაღის მუნიციპალიტეტის ქალაქ წნორში მდებარე ღია აგრარული ბაზარი
ხვალ, 4 მაისიდან მუშაობას განაახლებს. სიღნაღის მუნიცპალიტეტის
მერიის ინფორმაციით, დღეის მდგომარეობით, ბაზარი სრულად აკმაყოფილებს
ჯანდაცვის სამინისტროს და სურსათის ეროვნული სააგენტოს მიერ დადგენილ
რეკომენდაციებს.
„ბაზრის ადმინისტრაციამ უნდა უზრუნველყოს:
ტერიტორიის საჭიროებისამებრ რეგულარული რეცხვა და სამუშაო ადგილების
სველი წესით დასუფთავება-დეზინფექცია.
- ბაზრის ტერიტორიაზე სატვირთო და მსუბუქი მანქანის შესვლისათვის
მათი რეცხვა და სადეზინფექციო ხსნარებით დამუშავება.
- აგრარული ბაზრის ტერიტორიაზე, შესაბამის ადგილას, საკმარისი
რაოდენობის ხელსაბანის და საპირფარეშოს არსებობა.
- მომხარებელთა/მყიდველთა ნაკადის დაცვა, რისთვისაც საჭიროა მკაცრად
განისაზღვროს და გაიმიჯნოს ბაზრის ტერიტორიაზე
მომხმარებელთა/მყიდველთა შესასვლელი და გამოსასვლელი, სათანადო
სავალდებულო ნიშნების მითითებით;
- მოვაჭრე პერსონალის იდენტიფიკაცია და მათი ჯანმრთელობის
მდგომარეობის გაკონტროლება ტემპერატურის გაზომვით.
აგრარულ ბაზარში მოვაჭრე პერსონალი ვალდებულია:
- უზრუნველყონ მომხარებელთა/მყიდველთა შორის სოციალური დისტანციის
დაცვა არანაკლებ 2 მ მანძილზე;
- სამუშაოების შესრულებისას გამოიყენონ ინდივიდუალური დაცვის
საშუალებები.
- სამუშაოს დაწყებისა და დამთავრებისას სადეზინფექციო საშუალებებით
დაასუფთავონ სამუშაო ადგილები და ის ხელსაწყოები, რომელსაც იყენებენ
სამუშაო პროცესის მიმდინარეობისას;
მომხმარებლის/მყიდველის ვალდებულებები:
- მოქალაქეები, რომლებიც ღია ტიპის აგრარულ ბაზარს ესტუმრებიან,
პირბადეებით უნდა იყვნენ აღჭურვილნი.
- დაიცვან სოციალური დისტანცია არა ნაკლებ 2 მ მანძილისა;
- აგრარული ბაზრის ტერიტორიაზე შესვლა და გამოსვლა განახორციელონ
მხოლოდ მითითებული სავალდებულო ნიშნის მიხედვით.“ - აღნიშნულია მერიის
მიერ გავრცელებულ ინფორმაციაში.
შეგახსენებთ, რომ კახეთის რეგიონში ფუნქციონირება უკვე დაიწყო
თელავის ბაზარმა. თუმცა, ამ დრომდე კვლავ
დახურულია გურჯაანისა და იორმუღანლოს ბაზრები.
მასალის გამოყენების პირობები