პარტია „კონსერვატიული მოძრაობა“ (ალტ-ინფო) სასამართლომ 218 000 ლარით დააჯარიმა. სარჩელი პარტიის წინააღმდეგ სასამართლოში აუდიტის სამსახურმა შეიტანა.

აუდიტის სამსახური „კონსერვატიულ მოძრაობას“ ორ საკითხზე ედავებოდა.

კერძოდ, 2021 წელს შევსებული დეკლარაცია, რომელზეც აუდიტის სამსახური აცხადებდა, რომ დოკუმენტი არასწორად იყო შევსებული - მაშინ, როდესაც პარტია წერდა, რომ დეკემბერში ფინანსური ბრუნვა არ ჰქონია, ამ დროს გაიხსნა „კონსერვატიული მოძრაობის“ ოფისები.

გარდა ზემოაღნიშნულისა, აუდიტის სამსახური პარტიას არაფულადი შემოწირულობების დამალვასაც ედავებოდა - პარტიამ აუდიტის სამსახურში არ წარადგინა ინფორმაცია არაფულად შემოწირულობებზე - ბრენდირებული მასალის დაბეჭდვასა და რეგიონული ოფისების რემონტზე. ერთ კონკრეტულ შემთხვევაში პარტიამ ოფისი ხელშეკრულების გარეშე იქირავა(საქმე ეხება 72 000 ლარს).