რა ვითარებაა სოფელ ართანასა და თუშეთში-შს სამინისტროს განცხადება
საგანგებო შტაბი კახეთში მუშაობას აქტიურ რეჟიმში აგრძელებს. შტაბის
წევრებმა შსს-ს ვერტმფრენით საკონტროლო გაფრენა განახორციელეს და
სოფელ ართანას მიმდებარედ, ტყის მასივში არსებული ცეცხლის კერები
დაათვალიერეს.
შსს-ს საგანგებო სიტუაციების მართვის სააგენტოს მეხანძრე-მაშველებთან
ერთად, ხანძრის სალიკვიდაციო სამუშაოებში შსს-ს განსაკუთრებულ
დავალებათა დეპარტამენტის 400-მდე თანამშრომელი მონაწილეობს. ცეცხლის
ქრობის პროცესი ორი მიმართულებით მიმდინარეობს: ალპურ ზონასა და ტყის
ფოთლოვან ნაწილში.
სამინისტროს ინფორმაციით, რთული რელიეფის გამო, მეხანძრე-მაშველები
ალტერნატიულ ცეცხლმაქრ საშუალებებს იყენებენ. ხანძრის სალიკვიდაციო
სამუშაოებში დილიდან ჩართულია სამი ვერტმფრენი.
ცეცხლის ქრობის ინტენსიური სამუშაოები გრძელდება მთა-თუშეთშიც, სოფელ
ხახაბოსთან, ტყის მასივში არსებულ ხანძრის კერებზე. რთული რელიეფის
მიუხედავად, მთის ფერდობზე შესაძლებელი გახდა წყლის ხელოვნური
რეზერვუარების დამონტაჟება და კერების დამუშავება.
ადგილზე მუშაობენ მეხანძრე-მაშველები და ეროვნული სატყეო სააგენტოს
თანამშრომლები. ცეცხლის ქრობის პროცესში ჩართულია შსს-ს
ვერტმფრენი.
უწყების ცნობითვე, ყვარლის მუნიციპალიტეტის სოფელ შილდაში
მეხანძრე-მაშველები ნახანძრალი ტერიტორიის დამუშავებას აგრძელებენ.
ცოცხალი ძალა ადგილზე ხანძრის სრულ ლიკვიდირებამდე დარჩება.
მასალის გამოყენების პირობები