დედოფლისწყაროს მუნიციპალიტეტში მდებარე სამუხის ველზე გადამფრენ ფრინველებზე ნადირობა დროებით აიკრძალა.

ინფორმაციას აღნიშნულთან დაკავშირებით, საქართველოს გარემოს დაცვისა და სოფლის მეურნეობის სამინისტრო ავრცელებს.

სამინისტრომ გადაწყვეტილება საქართველოს „წითელ ნუსხაში“ შეტანილი ქურციკის/ჯეირანის რეინტროდუქციის პროექტის წარმატებულად განხორციელების მიზნით მიიღო.

„საქართველოს ,,წითელ ნუსხაში“ შეტანილი ქურციკის/ჯეირანის (Gasella subgutturosa) რეინტროდუქციის პროექტის წარმატებულად განხორციელების მიზნით, 2023 წლის 1 მარტამდე, აიკრძალოს გადამფრენ ფრინველებზე ნადირობა დედოფლისწყაროს მუნიციპალიტეტში, ვაშლოვანის დაცული ტერიტორიების საზღვარსა და საქართველო-აზერბაიჯანის სახელმწიფო საზღვარს შორის მოქცეულ სამუხის ველზე, ამ ბრძანების დანართი N1-ით განსაზღვრული რუკისა და დანართი N2-ით განსაზღვრული კოორდინატების შესაბამისად,“ - ვკითხულობთ განცხადებაში.

ინფორმაციაში აღნიშნულია, რომ სამინისტრომ გათვალისწინებული აკრძალვის შესრულებაზე კონტროლის განხორციელება გარემოსდაცვითი ზადამხედველობის დეპარტამენტს დაავალა.

ამ ბრძანების შესახებ საზოგადოებისთვის ინფორმაციის მიწოდება საქართველოს სტრატეგიული კომუნიკაციების დეპარტამენტს დაევალა.