განათლება
მომავალ სასწავლო წელს პირველ კლასში 1-ელ დეკემბრამდე დაბადებული ბავშვებიც დარეგისტრირდებიან
2024-2025 სასწავლო წელს პირველ კლასში დარეგისტრირებას შეძლებენ ბავშვები, რომლებსაც 6 წელი 1-ელ დეკემბრამდე შეუსრულდებათ, -ინფორმაციას აღნიშნულთან დაკავშირებით განათლებისა და მეცნიერების სამინისტრო ავრცელებს.

2025-2026 სასწავლო წლიდან კი ბავშვების რეგისტრაციაც იქნება შესაძლებელი, ვისაც 6 წელი 31 დეკემბრის ჩათვლით შეუსრულდება.

„2025-2026 სასწავლო წლიდან დაწყებით საფეხურზე სწავლის დაწყების შესაძლებლობა, მშობლის სურვილის შემთხვევაში, დამატებით მიეცემათ ბავშვებს, რომელთაც 6 წელი შეუსრულდებათ სასწავლო წლის დაწყების თარიღის მომდევნო დღიდან 31 დეკემბრის ჩათვლით.

აღნიშნული გადაწყვეტილების საფუძველი გახდა მოქალაქეთა არაერთი განცხადება, რომლებიც ითხოვენ საქართველოში დაწყებით საფეხურზე სწავლის დაწყების ასაკის მარეგულირებელი ნორმის გადახედვას.

აღსანიშნავია, რომ გადაწყვეტილების მიხედვით, ბავშვის მზაობისა და მისი საუკეთესო ინტერესების გათვალისწინებით, 2024-2025 სასწავლო წლის დაწყების მომდევნო დღიდან 1-ელ დეკემბრამდე დაბადებულ პირებს უფლება ექნებათ, გააკეთონ არჩევანი: გააგრძელონ სკოლამდელი აღზრდისა და განათლების მომსახურების მიღება სასკოლო მზაობის პროგრამაში ჩართვით, ან დარეგისტრირდნენ პირველკლასელებად. 2025-2026 სასწავლო წლიდან იგივე გავრცელდება 16 სექტემბრიდან 31 დეკემბრის ჩათვლით დაბადებულ ბავშვებზე,“ - აცხადებენ განათლებისა და მეცნიერების სამინისტროში.


| Print |
FaceBook Twitter Google