ამ დროის მონაცემებით კორონავირუსისგან კიდევ 2 პაციენტია გამოჯანმრთელებული. ჯამში ეს რიცხვი უკვე 79-ია.

კახეთიდან ლუგარის ლაბორატორიაში გუშინ გაგზავნილი 21 საეჭვო პაციენტების ტესტის პასუხები ცნობილია. კორონავირუსი არცერთ მათგანს არ დაუდასტურდა.

საქართველოს მთავრობა ფეისბუქის გვერდზე აქვეყნებს იმ კითხვა-პასუხებს, რაც შეიძლება კანონის გამკაცრების შემთხვევაში გაგიჩნდეთ. შემიძლია თუ არა გადაადგილება სასოფლო-სამეურნეო საქმიანობის განსახორციელებლად? შემიძლია თუ არა სასაფლაოზე წასვლა? პირბადის ტარების ვალდებულება რომელ დაწესებულებებში მაქვს? - ეს იმ კითხვების არასრული ჩამონათვალია, რომლებზე პასუხსაც აქ იპოვით.

საქართველოში ამ დროისთვის კორონავირუსის 370 დადასტურებული შემთხვევაა, მათ შორის გამოჯანმრთელებულია - 77.

დაავადებათა კონტროლის ეროვნული ცენტრის დირექტორის მოადგილე, პაატა იმნაძე მოსახლეობას მოუწოდებს დარჩნენ სახლში და არ წავიდნენ არანაირ შეკრებაზე. მთავარი რეკომენდაცია ისევ და ისევ არის ის, რომ ადამიანები მოერიდნენ ერთმანეთს.

დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ბოლო რამდენიმე დღის მონაცემები მიუთითებს, რომ ქვეყანაში სერიოზული შიდაგავრცელების პროცესი გვაქვს, რომელიც შეიძლება უკონტროლო გახდეს, თუკი არ შევასრულებთ ყველა იმ რეკომენდაციას, რომელსაც გასცემს საქართველოს მთავრობა, ჯანდაცვის სამინისტრო და დაავადებათა კონტროლოს ეროვნული ცენტრი.

დღის ბოლოს კორონავირუსის დადასტურებული შემთხვევების რიცხვი კიდევ 12-ით გაიზარდა. ამ დროისთვის სულ ქვეყანაში - 348 შემთხვევაა დაფიქსირებული.

ხვალიდან ქვეყანაში საგანგებო მდგომარეობის ფარგლებში დაწესებული აკრძალვები კიდევ უფრო მკაცრდება. მთავრობის გადაწყვეტილებით, 17 აპრილიდან სავალდებულო ხდება დახურულ სივრცეში პირბადეების ტარება.

15 აპრილის 21 საათიდან 16 აპრილის დილის 6 საათამდე, ე.წ. კომენდანტის საათის დარღვევის ფაქტზე, მთელი ქვეყნის მასშტაბით შინაგან საქმეთა სამინისტროს თანამშრომლებმა 92 მოქალაქე დააჯარიმეს.  საჯარო სივრცეში 3-ზე მეტი პირის შეკრების შეზღუდვის და 2-მეტრიანი სოციალური დისტანციის დაუცველობის გამო კი - 125 მოქალაქე.

ხვალიდან კახეთის რეგიონის რვავე მუნიციპალიტეტში სასაფლაოები 10 დღის განმავლობაში დაიკეტება. რეგიონის გუბერნატორის ირაკლი ქადაგიშვილის განცხადებით, გაძლიერებული იქნება საპოლიციო კონტროლი.