ქართველი პოეტი და საზოგადო მოღვაწე, საქართველოს სახალხო პოეტი,
ქართული პოეზიის ერთ-ერთი უდიდესი წარმომადგენელი - გალაკტიონ ტაბიძე
1891 წლის 17 ნოემბერს, ვანის რაიონის სოფელ ჭყვიშში დაიბადა.
პოეტის მამა, ვასილ ტაბიძე, შვილის დაბადებამდე ორი თვით ადრე
გარდაიცვალა. იგი ჯერ სოფლის მღვდელი, შემდეგ კი იმავე სოფლის
მასწავლებელი იყო.
1900 წელს ტაბიძე ჩაირიცხა ქუთაისის სასულიერო სასწავლებელში. 1908
წლიდან სწავლა განაგრძო თბილისის სასულიერო სემინარიაში. 1910-1911
წლებში მუშაობდა მასწავლებლად. 1917-1918 წლებში იმყოფებოდა მოსკოვსა
და პეტროგრადში. 1914 წელს გამოდის გ. ტაბიძის ლექსების პირველი
კრებული, რომელმაც ერთბაშად მიიპყრო საზოგადოების ყურადღება და დიდი
პოპულარობა მოიპოვა, ხოლო 1919 გამოცემულმა "არტისტულმა ყვავილებმა"
ავტორს "პოეტების მეფის" სახელი მოუტანეს. 1919 წლიდან ცხოვრობდა და
მოღვაწეობდა თბილისში. 1922-1923 წლებში გამოსცემდა "გალაკტიონ
ტაბიძის ჟურნალს". 1924 წელს იგი იყო ჟურნალის "მნათობი" ერთ-ერთი
ფუძემდებელი. 1935 წელს პარიზში მონაწილეობდა ანტიფაშისტურ
კონგრესში.
1959 წლის 17 მარტს გალაკტიონმა სიცოცხლე თვითმკვლელობით
დაასრულა.
მასალის გამოყენების პირობები