საგარეჯოს მუნიციპალიტეტის მერიის განათლების, კულტურის, ძეგლთა დაცვის, სპორტისა და ახალგაზრდულ საქმეთა სამსახურის ორგანიზებით საგარეჯოში ინტელექტუალური და გასართობი თამაში „ქალაქობანა“ გაიმართება, რომელიც საგარეჯოს ქალაქად აღიარების 60-ე წლისთავს მიეძღვნება.
აღნიშნული პროექტის მიზანია ჯანსაღი ცხოვრების წესის პოპულარიზაცია და თავისუფალი დროის სწორად გამოყენება. თამაში გუნდური სახით წარიმართება.

თამაშის პირობები ასეთია:

• თამაში წარიმართება ღია ცის ქვეშ და მოიცავს ქალაქის სხვადასხვა ლოკაციას;
• თამაშის დასაწყისში თითოეულ გუნდს გადაეცემა მათთვის განკუთვნილი ფერადი დროშები, რომელზეც გამოსახული იქნება თამაშის ლოგო;
• თამაშის პრინციპია გუნდური თამაში;
• გუნდი უნდა შედგებოდეს არაუმეტეს 5 მონაწილისგან;
• მონაწილეთა ასაკი განისაზღვრება 18 წლიდან და ზევით;
• ყველა მონაწილე გუნდი გავა ერთი საწყისი წერტილიდან;
• თითოეულ გუნდს მიეცემა მათთვის განკუთვნილი სამოქმედო გეგმა;
• გუნდის მიზანია ამოიცნოს მინიშნება და გადავიდეს შემდეგ ეტაპზე;
• გამარჯვებულა ითვლება ის გუნდი, რომელიც პირველი მიიტანს მინიშნებას დანიშნულების ადგილზე;
• გამარჯვებულ გუნდს გადაეცემა ფულადი ჯილდო 2000 ლარის ოდენობით;
• თამაშის ხანგრძლივობა 3 საათი;
• თითოეულ გუნდს გაჰყვება კოორდინატორი, რომელიც თამაშის პერიოდში განახორციელებს პირდაპირ ჩართვებს სოციალურ ქსელში თამაშის გვერდზე;
• გუნდს ეყოლება კაპიტანი, ერქმევა სახელი და სასურველია ჰქონდეს სიმბოლიკაც

საგარეჯოს მუნიციპალიტეტის ახალგაზრდული სამსახურის რეკომენდაციით, მონაწილეებისთვის სასურველია საგარეჯოს ისტორიის ცოდნა.

როგორც ახალგაზრდული სამსახურის თანამშრომელი ნინო ესაიაშვილი SPEQTRI.GE-სთან საუბარში აღნიშნავს, მსგავსი სახის ღონისძიება საგარეჯოს მუნიციპალიტეტში პირველად ხორციელდება და პირველ ეტაპზე თამაშში მონაწილეობა მხოლოდ საგარეჯოს მუნიციპალიტეტის მოსახლეობას შეეძლება.

მისივე თქმით, თამაში, სავარაუდოდ, სექტემბრის დასაწყისში ჩატარდება.