შპს „საგზაო სამშენებლო-სარემონტო კომპანია „სერპანტინმა“ დანაპირები შეასრულა და გამოთბა თუ არა, გზის სარეაბილიტაციო სამუშაოები დაიწყო. როგორც კომპანიის დირექტორი ზურაბ ფეიქრიშვილი speqtri.ge-სთან საუბარში განმარტავს, ხარვეზების გამოსწორების სამუშაოები უკვე მიმდინარეობს და მალე დასრულდება. „ხარვეზების გამოსწორება საზედამხედველო სამსახურთან ერთად ხდება. აქტი გაკეთებულია, მოინიშნა აქერცლილი ადგილები, რომელიც ზამთარში მარილის დაყრის გამო დაზიანდა და ბიტუმით იყო გადაკერილი. ამ ეტაპზე მოიხსნა დაზიანებული ასფალტის საფარი, მოიფრეზა, შემდეგ მოხდა მისი წებო-ემულსიით დამუშავება, რის შემდგომაც მოხსნილი საფარი წვრილმარცვლოვანი ასფალტო-ბეტონით შეივსება. მაგასაც გავაკეთებთ, გადავაგებთ ახალ ასფალტს და ობიექტზე აღარაფერი პრობლემა აღარ იქნება“, - განაცხადა ზურაბ ფეიქრიშვილმა. მისივე თქმით, მთლიანი გზის მხოლოდ პატარა მონაკვეთია დაზიანებული, რომელიც დაახლოებით 300 კვადრატულ მეტრს შეადგენს. „ხარვეზების ადგილები ზუსტად არ მახსოვს, თუმცა დაზიანება სულ 300 კვ.მ-ია, რაც თავის მხრივ ტრაგედია არ არის. 15- 20 ათას კვადრატულ მეტრზე ამ მასშტაბის ხარვეზი ნორმალურია“. კომპანია სერპანტინი სამუშაოებს დღის აქტიურ მონაკვეთში ახორციელებს. გურჯაანის ცენტრში მოძრავი ავტომობილები „მოძრაობის აკრძალვის“ ნიშანს არ ემორჩულებიან და დაზიანებულ მონაკვეთზე მაინც გადადიან. ზურაბ ფეიქრიშვილი განმარტავს, რომ მსგავსი პრობლემა გურჯაანში ყოველთვის იყო, თუმცა კომპანია მაინც ახერხებდა მუშაობას. ჩვენს კითხვაზე: რამდენად დააზიანებს ახლადდაგებულ ასფალტს ავტომობილების ასეთი მოძრაობა, „სერპანტინის“ დირექტორი გვარწმუნებს, რომ ამის საშიშროება არ არსებობს. „ახალდაგებულზე მანქანებივერ შევლენ. თუმცა, ასეც რომ იყოს, პრობლემა მაინც არ არსებობს. ასფალტის ახალი საფარი საკმაოდ მძიმეწონიანი ვიბროსატკეპნით მუშავდება, რის შემდეგაც ჩვეულებრივი მსუბუქი ავტომობილი ვერაფერს დააკლებს“. შეგახსენებთ, რომ ახმეტა-თელავი-ბაკურციხის საავტომობილო გზის ცხრაკილომეტრიანი მონაკვეთი, პროექტის დასრულებამდე დაზიანდა. ხარვეზების აღმოფხვა კომპანია „სერპანტინმა“ დროებით ბიტუმის გამოყენებით მოახერხა. რეაბილიტირებული მონაკვეთი ქ. გურჯაანის ტერიტორიაზე იწყება და საერთაშორისო მნიშვნელობის თბილისი–ბაკურციხე–ლაგოდეხის საავტომობილო გზის მიერთებაზე მთავრდება. პროექტის ფარგლებში აღდგა საგზაო საფარი, გაიწმინდა და შეკეთდა გვერდულები, მოეწყო კიუვეტები, მილები და ტროტუარები. განხორციელდა სავალი ნაწილის მონიშვნის სამუშაოები. რეაბილიტირებული გზით კახეთის რეგიონის რამდენიმე სოფლის- ჭანდრის, ვეჯინის, კოლაგისა და ბაკურციხის მოსახლეობა სარგებლობს. სამუშაოებზე 65 ადგილობრივი მცხოვრები იყო დასაქმებული. პროექტი სახელმწიფო ბიუჯეტიდან დაფინანსდა და მისმა ღირებულებამ 5 მილიონ 444 ათასი ლასი შეადგინა. კომპანიამ საავტომობილო გზის რეაბილიტაცია 2015 წლის მარტში დაასრულა.