მედიატურის ფარგლებში ოთარ დანელია 42 საწარმოს ხელმძღვანელებს შეხვდა
სოფლის მეურნეობის სამინისტროს მიერ ახალი საწარმოების დათვალიერების მიზნით გამართული მედიატურის ფარგლებში, სოფლის მეურნეობის მინისტრი ოთარ დანელია კახეთში დაფინანსებული 42 ახალი საწარმოს ხელმძღვანელებს შეხვდა.
შეხვედრა სასტუმრო „როიალ ბატონში" გაიმართა, რომელსაც მედიატურის მონაწილე ჟურნალისტები დაესწრნენ.
ჟურნალისტებს დაფინანსებული ახალი საწარმოების შესახებ დეტალური ინფორმაცია სოფლის მეურნეობის მინისტრმა მიაწოდა. შეხვედრა კითხვა-პასუხის რეჟიმში გაიმართა. მეწარმეებმა აღნიშნეს, რომ კრედიტის აღების პროცესში არანაირი პრობლემა არ შექმნიათ და ასეთი ხელშეწყობა მთავრობისგან ადრე არასდროს მიუღიათ.
სოფლის მეურნეობის სამინისტროს ინფორმაციით, აგროწარმოების განვითარების მიზნით, სამინისტროს ინიციატივით, არაერთი პროექტი (შეღავათიანი აგროკრედიტის პროექტი, გადამამუშავებლი საწარმოების თანადაფინანსების პროექტი, პროგრამა „აწარმოე საქართველოში“) ხორციელდება, რომლის ფარგლებშიც უკვე დაფინანსებულია 119 ახალი საწარმო, ჯამში, განხორციელებული ინვესტიცია 100 მილიონ 800 ათას აშშ დოლარს, ხოლო ახალი სამუშაო ადგილების რაოდენობა, დაახლოებით, 3700 -ს შეადგენს. გაფართოვდა 600-ზე მეტი საწარმო და საერთო ჯამში შექმნილია 10 ათასამდე სამუშაო ადგილი.
მათივე ცნობით, რაც შეეხება კახეთის რეგიონს, დაფინანსებულია 42 ახალი საწარმო, დასაქმდა 1025 ადამიანი, განხორციელდა 39 700 000 აშშ დოლარის ინვესტიცია. დაფინანსებულია სოფლის მეურნეობის სხვადასხვა დარგი: 16 ღვინის წარმოება, 7 მესაქონლეობა, 7 სასაწყობო მეურნეობა, 3 მეფრინველეობა, 2 ცხვრის მოშენება, 2 ხილის გადამუშავება, 1 მეღორეობა, 1 ცხოველის საკვების წარმოება, 1 მუხის კასრების წარმოება და 1 სასათბურე მეურნეობა.
მედიატურში ჟურნალისტებთან ერთად მონაწილეობენ სოფლის მეურნეობის მინისტრი ოთარ დანელია, სოფლის მეურნეობის მინისტრის მოადგილეები ნოდარ კერესელიძე და ლევან დავითაშვილი, სოფლის მეურნეობის პროექტების მართვის სააგენტოს დირექტორი მარიანა მორგოშია და „შეღავათიანი აგროკრედიტის პროექტის“ მენეჯერი ირაკლი მოისწრაფიშვილი.
მასალის გამოყენების პირობები