საქართველოში ვიზიტის ფარგლებში ჩინეთის სახალხო რესპუბლიკის სოფლის მეურნეობის მინისტრი, ჰან ჩანგფუ კახეთს ესტუმრა. ჩინეთის დელეგაციამ ალავრდის სამონასტრო კომლექსი, ალავერდის ღვინის მარანი და საფუტკრე მეურნეობა, ასევე, წინანდალში 100 წლიანი ვაზი და ყვარელში ტურისტული კომპლექსი „გვირაბი“ დაათვალიერა. ჩინეთის სახალხო რესპუბლიკის სოფლის მეურნეობის სამინისტროს დელეგაცია, რომელსაც მინისტრი ჰან ჩანგფუ ხელმძღვანელობს საქართველოში ორდღიანი ოფიციალური ვიზიტით ჩამოვიდა. შეხვედრაზე მინისტრებმა ხაზი გაუსვეს საქართველოსა და ჩინეთს შორის სავაჭრო ურთიერთობის განსაკუთრებულ მნიშვნელობას და ერთობლივ სამოქმედო გეგმას მოაწერეს ხელი. სამოქმედო გეგმაზე ხელმოწერით საქართველო-ჩინეთს შორის აგრარული დარგის მიმართულებით თანამშრომლობის ახალი ეტაპი იწყება. ჩინეთის სახალხო რესპუბლიკა ქართული ღვინის მნიშვნელოვანი იმპორტიორი ქვეყანაა. 2015 წლის იანვარ-თებერვალში ქართული ღვინის ექსპორტი ჩინეთში 66,4%-ით აღემატება წინა წლის შესაბამისი პერიოდის ანალოგიურ მაჩვენებელს. შეხვედრის შემდეგ მინისტრებმა ერთობლივი პრესკონფერენცია გამართეს. „მნიშვნელოვანია, რომ საქართველოს ეკონომიკაში ჩინური ინვესტიციები მნიშვნელოვანად გაიზრდა. ჩვენ ვგეგმავთ კიდევ უფრო გავზარდოთ სავაჭრო კავშირები, ასევე, ვითანამშრომლოთ სოფლის მეურნეობის ინფრასტრუქტურის განვითარებისა და აგრარულ მრეწველობაში უახლესი ტექნოლოგიების დანერგვის მიმართულებით. 2014 წელს საქართველოს სოფლის მეურნეობის სამინისტრომ ჩინეთის რესპუბლიკის მთავრობისგან გრანტის სახით, საჩუქრად 30 ერთეული თანამედროვე ტექნიკა მიიღო. აღნიშნული ტექნიკა საქართველოში საირიგაციო სისტემებზე მიმდინარე სამუშაოებისთვის გამოიყენება. ასევე, 2015 წლის აპრილში ჩინეთის რესპუბლიკის მთავრობა საქართველოს სოფლის მეურნეობის სამინისტროს უსასყიდლოდ გადმოსცემს 26 ერთეულ სამელიორაციო ტექნიკას, რომლის ღირებულება 10 764 000 აშშ დოლარს შეადგენს“, - განაცხადა ოთარ დანელიამ. ჩინეთის სოფლის მეურნეობის მინისტრის განცხადებით, საქართველო-ჩინეთს შორის ურთიერთობების გაღრმავების ერთ-ერთი უმთავრესი კომპონენტი აგრარული მიმართულება შეიძლება იყოს. „ქართულ ღვინოს აქვს უდიდესი პოტენციალი, დაიმკვიდროს ადგილი არა მარტო ჩინეთის, არამედ მსოფლიო ბაზარზე. ასევე უმნიშვნელოვანესია ჩაის კულტურის აღორძინების ხელშეწყობა. ჩვენი გამოცდილების გაზიარება ამ მიმართულებით ძალიან გამოგადგებათ. მინდა როგორც თქვენი ქვეყნის, ასევე ჩინეთის რესპუბლიკის პრემიერმინისტრთან დავაფიქსირო ჩემი მოსაზრება საქართველოს აგრარული პოტენციალის შესახებ. თქვენ უკვე გაქვთ სოფლის მეურნეობის განვითარების ისეთი სტატეგია და სამოქმედო გეგმა, რომლის განხორციელებაც დარგის განვითარებაში მნიშვნელოვანი წინსვლის გარანტიაა“, - განაცხადა ჩინეთის სახალხო რესპუბლიკის სოფლის მეურნეობის მინისტრმა, ჰან ჩანგფუმ. აღსანიშნავია, რომ ჩინეთი საქართველოს უმსხვილეს სავაჭრო პარტნიორთა ხუთეულშია. ორდღიანი ოფიციალური ვიზიტის ფარგლებში, ჰან ჩანგფუ შეხვედრას საქართველოს პრემიერ-მინისტრთან, ირაკლი ღარიბაშვილთანაც გამართავს.