გასულ კვირას დედოფლისწყაროში „მიკრო და მცირე მეწარმეობის ხელშეწყობის პროგრამის“ პრეზენტაცია გაიმართა , რომელსაც კახეთის რეგიონში პროექტის განმახორციელებელი ორგანიზაციისა და საზოგადოების წარმომადგენლები ესწრებოდნენ. შეხვედრის დასასრულს პრეზენტატორებმა მოსახლეობისთვის საინტერესო კითხვებს ამომწურავად უპასაუხეს. თბილისის ბიზნეს ტრენინგის ცენტრის დირექტორი, ეკონომიკის დოქტორი, პროფესორი მალხაზ შუბითიძე აღნიშნავს, რომ პროექტი, რომელიც მეწარმეობის ხელშეწყობას ისახავს მიზნად, უპრეცედენტოა, რადგან დაფინანსების წყარო არის საქართველოს ცენტრალური ბიუჯეტი. - „პროგრამა ინიცირებულია საქართველოს პრემიერ-მინისტრის ირაკლი ღარიბაშვილის მიერ და მეტ-ნაკლებად კარგად არის ცნობილი, რადგან გასულ წელს დაიწყო. იდეის განსახორციელებლად შეიქმნა „მეწარმეობის განვითარების სააგენტო“. შარშანვე ჩატარდა პირველი კონკურსები, გამოვლინდნენ გამარჯვებულები, რომლებიც პროექტს განახორციელებენ იმერეთში, რაჭა-ლეჩხუმში, ზემო სვანეთში, ასევე ქვემო ქართლსა და სამცხე-ჯავახეთში. წელს, 31 მაისს დასრულდა კონკურსის მეორე ეტაპი. გამოვლინდა ორი გამარჯვებული „თბილისის ბიზნეს ტრენინგის ცენტრი“, რომლის პასუხისმგებლობის ზონაა: კახეთი, მცხეთა-მთიანეთი, შიდა ქართლი და კომპანია „ინნოვა“, რომელიც ამ პროექტს განახორციელებს აჭარის, რაჭის, სამეგრელოსა და ზემო სვანეთის რეგიონებში“. როგორც ბატონი მალხაზი აღნიშნავს, პროგრამის დაწყებამდე გამოიკვლიეს ის პრობლემები, რომლის წინაშეც დგას ქვეყნის ეკონომიკა, აღმოჩნდა, რომ ბიზნესის ბრუნვის თვალსაზრისით არსებობს უზარმაზარი დისპროპორცია თბილისსა და მის მიღმა საქართველოს შორის. „განსხვავება თბილისსა და რეგიონებს შორის არის დაახლოებით შვიდნახევარჯერ. იმავდროულად, გვაქვს ძალიან დაბალი პროდუქტიულობის მაჩვენებელი. თუ შევადარებთ სხვა ქვეყნის მონაცემს, ერთი ჰოლანდიელი ფერმერი დაახლოებით, 30-ჯერ მეტს აწარმოებს, ვიდრე - ქართველი. გასაგებია, რომ ძალიან მძიმე 25 წელიწადი გავიარეთ, მაგრამ წარსულის ყურება არაფერს მოგვცემს, ჩვენ გვჭირდება წინსვლა. კიდევ ერთი პრობლემა, რომელიც კვლევის დროს გამოიკვეთა, შიდა პროდუქტის დაბალი კონკურენტუნარიანობაა. დღეს ჩვენ აღმოვჩნდით იმ ამოცანის წინაშე, როცა ქართულმა ბიზნესმა შიდა ბაზარი უნდა აითვისოს, პრაქტიკულად, ქართული ბაზარი არის დაკარგული. პროდუქციის სულ რამდენიმე სახეობა გვაქვს, რომლითაც შეგვიძლია მსოფლიო ბაზარზე თავი მოვიწონოთ, რა თქმა უნდა, ასე გაგრძელება არ შეიძლება. გამოკვეთილია საკმაოდ მძიმე ტენდენცია, რომ ფული, რომელიც გამომუშავდება რეგიონებში, იხარჯება თბილისში. ეს გამოწვეულია ინფრასტრუქტურის არარსებობის გამო. თუ თბილისი იქნება ცალკე და რეგიონები ცალკე, ვეღარც დედაქალაქი განვითარდება და რეგიონებიც რეგრესისკენ წავა. ეს არის ის გარკვეული წინაპირობები, რომლებიც კვლევის შედეგად გამოიკვეთა და სწორედ მათ დასაძლევედ დამუშავდა „მიკრო და მცირე მეწარმეობის ხელშეწყობის პროგრამა.“ მისი მთლიანი ბიუჯეტი შეადგენს 20 მილიონ ლარს, გათვლილია 26 თვეზე და მოიცავს მთელს საქართველოს, თბილისისა და ოკუპირებული რეგიონების გარდა.“ პროგრამის ფარგლებში ბენეფიციარები მიიღებენ როგორც ფინანსურ მხარდაჭერას, ასევე მნიშვნელოვან თეორიულ ცოდნას, რომელიც ყველა ბიზნესის განვითარებას სჭირდება. - „ეს არის მინიმუმ ერთწლიანი დახმარება, ახალი ცოდნა, გადამზადება და კონსულტაციები ბიზნესის სფეროში. თუ საკონკურსო იდეა შეეხება სოფლის მეურნეობის სფეროს და გამარჯვებულად ჩაითვლება, ჩვენ აუცილებლად ჩავრთავთ სოფლის მეურნეობის ცნობილ სპეციალისტებს; თუ იდეა შეეხება მეცხოველეობას, კონსულტაციას გაუწევენ ამ სფეროს ცნობილი სპეციალისტები და ა. შ. რაც შეეხება დაფინანსებას, სახელმწიფო თანადაფინანსების ფარგლებში გამოყოფს 5 ათას ლარს, თუმცა ითხოვს თანამონაწილეობას ათასი ლარით, თუ ორი პირი გაერთიანდება და შეიქმნება ამხანაგობა, თანადაფინანსების სახით გამოიყოფა 10 ათასი ლარი და თანამონაწილეობა გახდება 2 ათასი, სამი პირის გაერთიანების შემთხვევაში, თანხა გაიზრდება მაქსიმალურ ზღვრამდე - 15 ათას ლარამდე, ხოლო თანამონაწილეობა გახდება 3 ათასი.“ მანამდე კი, აუცილებელი პირობაა ბენეფიციარმა ატვირთოს ბიზნესიდეა საიტზე www.qartuli.ge. რაც შეეხება შეზღუდვებს, ამ პროგრამის ფარგლებში ეკონომიკური საქმიანობისთვის შეზღუდვა არ არსებობს, ბიზნესიდეების კონკურსის ბოლო ვადა 15 აგვისტოა. შეხვედრის დასასრულს, მოსახლეობამ პრეზენტატორს სხვადასხვა კითხვით მიმართა: - თუ შესაძლებელია საწარმოსთვის შენობა რომ ავაშენო? -მშენებლობისთვის თანადაფინანსების თანხის გამოყენება არ შეიძლება, თუმცა ამ ტიპის სამუშაოებისთვის შესაძლებელია თანხის გახარჯვა თანამონაწილეობიდან. -თანამონაწილეობისთვის სავალებულოა მხოლოდ თანხა, თუ უძრავი ქონებაც დასაშვებია? - თანამონაწილეობა შესაძლებელია მხოლოდ თანხით. - თუკი იდეა ეხება სოფლის მეურნეობას, მაგრამ არ მაქვს მიწა, შემიძლია ვიქირაო? - ვისაც საკუთარი ქონება არ აქვს, შეუძლია იქირაოს, ამაზე შეზღუდვა არ არსებობს. - ჩვენი ბიზნეს იდეა საჯაროა და სხვებისთვისაც ხელმისაწვდომია? - ამის ნახვა შეუძლია მხოლოდ ბიზნესიდეის ავტორს და ეკონომიკის სამინისტროს მეწარმეობის განვითარების სააგენტოს და ჩვენს ცენტრს. - პიროვნება, რომელიც ჩაწერილია თბილისში, მაგრამ რეალურად რეგიონში ცხოვრობს, ეკრძალება თუ არა პროექტში მონაწილეობა? - არ ეკრძალება, მთავარია ბიზნესიდეა ეხებოდეს რეგიონს. - ვის მიენიჭება პრიორიტეტი ბიზნესიდეის განხილვის დროს? - ახალგაზრდა აპლიკანტს ექნება უპირატესობა, იმ არგუმენტით, რომ დამაგრდეს სოფელში. - თანამონაწილეობის თანხა აპლიკანტს უნდა ჰქონდეს ბანკში თუ ხელზე? -არ აქვს მნიშვნელობა, ეს თანხა უნდა დახარჯოს პირველ ეტაპზე.