ივნისში ამერიკის შეერთებული შტატების რამდენიმე ქალაქში, ქართული ღვინის დეგუსტაცია-პრეზენტაციები გაიმართება.

ღვინის ეროვნული სააგენტოს კონტრაქტორი კომპანიების „Tastingwork”-ისა და ,,Marq Energie Consulting’’-ის ორგანიზებით, ნიუ-იორკში, სან-ფრანცისკოში, ჰიუსტონსა და პორტლენდში ღვინის პროფესიონალებს შესაძლებლობა ეძლევათ დააგემოვნონ სხვადასხვა სახეობის ქართული ღვინო.
უწყების ინფორმაციით, დეგუსტაციების პარალელურად ჩატარდება სემინარები ქართული ღვინის კულტურისა და ისტორიის შესახებ. სტუმრებს შესაძლებლობა ექნებათ დააგემოვნონ როგორც ქართული ტრადიციული, ისე კლასიკური მეთოდებით დამზადებული ღვინოები.

აღნიშნული კამპანიის ფარგლებში, „Tastingwork”-ის ორგანიზებით დეგუსტაცია უკვე გაიმართა ნიუ-იორკში, სადაც „Tastingwork”-ის დამფუძნებელმა, ღვინის მაგისტრმა ლიზა გრანიკმა სემინარი ქვევრის ღვინოზე (Inside The Qvevri) წაიკითხა. დეგუსტაციაზე წარმოდგენილი იყო 30-მდე ქართული ღვინის მწარმოებელი როგორც მცირე მარნის, ისე დიდი კომპანიის ღვინოები.

11 ივნისს „Tastingwork”-ის ორგანიზებით დეგუსტაცია გაიმართება სან-ფრანცისკოში, ღვინის სკოლაში, ხოლო ,,Marq Energie Consulting’’-ის ორგანიზებით ქართული ღვინის დეგუსტაციები 12 ივნისს პორტლენდში და 13 ივნისს ჰიუსტონში იგეგმება.
ღვინის მოხმარების ბაზრის კვლევების თანახმად, აშშ-ში წლის განმავლობაში 3 მლრდ. ლიტრზე მეტი ღვინო მოიხმარება, რაც ქართული ღვინის მწარმოებლებთან თანმიმდევრული და მიზანმიმართული თანამშრომლობით, აშშ-ს ბაზარზე ქართული ღვინის ექსპორტის ზრდის შესაძლებლობას იძლევა