ლანა გულოშვილი

20 აგვისტოს კახეთს სტიქია კიდევ ერთხელ დაატყდა. ძლიერმა ქარმა და სეტყვამ ამჯერად საგარეჯოს, ლაგოდეხის, ყვარლის და გურჯაანის მუნიციპალიტეტები დააზარალა. საგარეჯოში ქარმა 185 სახლს მოხადა სახურავი, ლაგოდეხში _ 639-ს, ყვარელში 33-ს. გურჯანის მუნიციპალიტეტში 424 სახლია დაზიანებული, აქედან ქარმა ჭერი ქალაქის 8 საერთო საცხოვრებელს გადახადა. სტიქიის შედეგად კახეთის მასშტაბით სულ 1300-მდე ოჯახია დაზარალებული. დასეტყვილი მიწის ფართობი კი 1800-მდე ჰექტარს შეადგენს. სტიქიიდან მეორე დღეს საქართველოს პრეზიდენტი მიხეილ სააკაშვილი დაზარალებულ მოსახლეობას შეხვდა და დახმარებას დაპირდა. როგორც ცენტრალურ და ადგილობრივ ხელისუფლებაში აცხადებენ, ზარალის ასანაზღაურებლად თანხები კვლავ გაიცემა.