”მოძრაობა სახელმწიფო ხალხისთვის”, ”გირჩი”, ”ახალი მემარჯვენეები” და ”ახალი საქართველო” ერთ საარჩევნო პლატფორმად ჩამოყალიბდა. პარტიების ეს გადაწყვეტილება speqtri.ge-მ გურჯაანში პოლიტიკოსებს შეაფასებინა.
”მოძრაობა სახელმწიფო ხალხისთვის” გურჯაანის რაიონული ორგანიზაციის თავმჯდომარის გიორგი ხაზიურის თქმით, პარტიებს საერთო იდეები ჰქონდათ და აღნიშნული გადაწყვეტილებაც აქედან გამომდინარე მიიღეს.

„თავის დროზე, ამ ადამიანებმა გადადგეს პოლიტიკურად სწორი ნაბიჯი, როდესაც „ნაციონალურ მოძრაობას“ გაემიჯნენ. ისინი საკმაოდ ჩამოყალიბებულები არიან. გუნდში ეკონომიკური და პოლიტიკური ექსპერტები ჰყავთ. ვაშაძემ კარგი მუშაობა გასწია ახალგზრდებთან. შეიძლება, ადამიანი „ნაციონალურ მოძრაობაში“ იყო, მაგრამ არ მონაწილეობდე დანაშაულებრივ საქმეში. ჩვენთან მოვიდნენ იმიტომ, რომ მზარდი რეიტინგი და სერიოზული პროგრამა გვაქვს. საერთო იდეები გვქონდა და ამიტომ მიიღო პაატა ბურჭულაძემ გადაწყვეტილება. თუმცა ეს არ იყო ერთპიროვნული. კანდიდატების წარდგენას რაც შეეხება, კონსენსუსი შედგება, რადგანაც ჩვენ შედეგზე ორიენტირებულები ვართ.“

„თავისუფალი დემოკრატების“ გურჯაანის მაჟორიტარი დეპუტატობის კანდიდატი სიმონ ქოჩორიშვილი მიიჩნევს, რომ ამ გაერთიანებით ნათელი გახდა, თითოეული პარტიის პოლიტიკური მიზანი.

„მათ მოახდინეს ლუსტრაცია, როგორც თავის დროზე „ქრისტიან დემოკრატებმა.“ ესენი არიან „ნაციონალური მოძრაობის“ სატელიტები. არჩევნებამდე ყველას პოლიტიკური მისწრაფებები ნათელი გახდება და ამას ხალხი თავადვე დაინახავს. ბურჭულაძის პარტია თითქოსდა მაღალი ნდობით დაარსდა, მაგრამ მისი რეიტინგი უკვე კატასტროფულად დაეცა. ეს კი პოლიტიკურად არასწორი ნაბიჯების შედეგია. მიმაჩნია, რომ ჩვენი კონკურენტები არიან დღევანდელი და წინა ხელისუფლება.“

აღნიშნულ პოლიტიკურ გადაწყვეტილებას აფასებენ „ქართულ ოცნებაშიც“.

„გაერთიანება მათი პრეროგატივაა, როგორც საჭიროდ ჩათვლიან, ისე უნდა მოიქცნენ. თუ საერთო პოლიტიკური ხედვა აქვთ, ცხადია, შესაძლებელია ერთ ბლოკად ჩამოყალიბების მიზეზი ეს იყოს. სამწუხაროდ, ამ საკითხთან დაკავშირებით, მეტს ვერაფერს გეტყვით. რაც შეეხება მათ რეიტინგს, არა მგონია დღეის მდგომარეობით „ქართულ ოცნებას“ კონკურენტი ჰყავდეს,“- აღნიშნა „ქართული ოცნების“ გურჯაანის მაჟორიტარი დეპუტატობის კანდიდატმა დავით სონღულაშვილმა.

„ერთიანი ნაციონალური მოძრაობის“ გურჯაანის მაჟორიტარი დეპუტატობის კანდიდატის- გიორგი ღვინიაშვილის განცხადებით, ბურჭულაძის პარტიას ამ ნაბიჯით რეიტინგი არ მომატებია.

„ყველას კარგად მოგეხენებათ ბიძინა ივანიშვილის სტილი პოლიტიკურ ოპონენტებთან დამოკიდებულებაში. მან ყოველგვარი ფინანსური შესაძლებლობები გადაუკეტა პაატა ბურჭულაძეს. ამიტომ, ის იძულებული გახდა, იმ პარტიებთან წასულიყო, რომლთა შორის ჩვენი ყოფილი თანაგუნდელებიც არიან და დღეისათვის ბიძინა ივანიშვილის სატელიტებს წარმოადგენენ. მიუხედავად ამ მეთოდებისა, ჩვენ რვა ოქტომბერს დავამთავრებთ ამ ხელისუფლებას. ამ ნაბიჯით პაატა ბურჭულაძის პარტიას რეიტინგი კი არ მოემატა, პირიქით, დააკლდა, რადგან ის ივანიშვილის სატელიტებთან გაერთიანდა.“

ფილოსოფოსი ზაზა ფირალიშვილი მიიჩნევს, რომ ერთ ბლოკად ჩამოყალიბების გადაწყვეტილებით, პაატა ბურჭულაძემ არასწორი პოლიტიკური ნაბიჯი გადადგა.

„პაატა ბურჭულაძესთან გაერთიანდა „ნაციონალური მოძრაობის“ ის ნაწილი, რომელსაც რეაბილიტაციისთვის ახალი პოლიტიკური სივრცე სჭირდება. თუმცა, ვერ გეტყვით, რამდენად გამოუვათ. რაც შეეხება პაატა ბურჭულაძეს, მიხეილ სააკაშვილთან მისი კავშირების შესახებ ბევრი მითქმა-მოთქმა იყო. მაინც არ მეგონა, რომ ის ამ ნაბიჯს გადადგამდა. ამით ის უფრო მეტს კარგავს, ვიდრე იძენს. თუ მანამდე ქართულ პოლიტიკაში გამორჩეულ ფიგურად აღიქმებოდა, ის ახლა არასახარბიელო კონტექსტშია. მე ვერ გეტყვით, რომ ამ ნაბიჯით ბურჭულაძის პარტიის რეიტინგი განსაკუთრებულად გაიზრდება. მოსალოდნელია ის, რომ ძველი მომხრეების მნიშვნელოვან ნაწილს დაკარგავს. ეს ჩანს კიდეც, პარტიიდან ყოველდღიურად ვიღაცები გადიან, ისინი, ვისთვისაც ეს ნაბიჯი მიუღებელია. ბურჭულაძეს გავუგებდი, საქმე რომ დაეჭირა „რესპუბლიკელებთან“, ან „თავისუფალ დემოკრატებთან“. ეს უფრო ლოგიკური იქნებოდა და შესაძლოა, უფრო საინტერესო ძალა მიგვეღო. „ნაციონალებიდან“ გამოსულ პარტიებთან კავშირი, არა მგონია, მისთვის მომგებიანი აღმოჩნდეს.“

პაატა ბურჭულაძემ პოლიტიკაში ჩართვის შესახებ 2016 წლის მაისში ჯერ წერილი გაავრცელა, შემდეგ კი ბრიფინგი გამართა და განაცხადა, რომ მის მიერ დაფუძნებული პარტია საპარლამენტო არჩევნებში მიიღებდა მონაწილეობას. პაატა ბურჭულაძე, რომელიც მანამდე საქველმოქმედო ფონდების დამფუძნებელი იყო, ბოლო დრომდე უარყოფდა, რომ პოლიტიკური საქმიანობის დაწყებას გეგმავდა. მან საპარლამენტო არჩევნებში მონაწილეობის სურვილი ოფიციალურად 12 მაისს გამოთქვა.