ამერიკის შეერთებული შტატების პრეზიდენტმა, ჯო ბაიდენმა უკრაინის
დემოკრატიის დასაცავად „ლენდ-ლიზის“ 2022 წლის კანონს ხელი მოაწერა.
ინფორმაციას აღნიშნულთან დაკავშირებით Ukrinform-ი
ავრცელებს.
როგორც სტატიაში ვკითხულობთ, ხელის მოწერის ცერემონიალი თეთრ სახლში,
9 მაისს შედგა.
უკრაინის დემოკრატიის დაცვის ლენდ-ლიზის აქტი აშშ-ის კონგრესის ორივე
პალატამ მიიღო. სენატმა დოკუმენტს მხარი 6 აპრილს ერთხმად დაუჭირა,
ხოლო 28 აპრილს წარმომადგენელთა პალატამ კენჭი უყარა მისაღებ
ზომებს.
დოკუმენტი აშშ-ის პრეზიდენტს ნებას რთავს, გამოიყენოს ლენდ-ლიზის
სამხედრო პროგრამა, რათა დააჩქაროს უკრაინისთვის იარაღის, სამხედრო
აღჭურვილობის, მედიცინის, საკვებისა და სხვა აუცილებელი რესურსის
მიწოდება. ეს გულისხმობს იმას, რომ უკრაინას ღირებულების გადახადა
მოგვიანებით შეეძლება.
ცნობისთვის, ლენდ-ლიზის სამხედრო პროგრამა პირველად მეორე მსოფლიო
ომის დროს გამოიყენეს. კერძოდ, პროგრამა აშშ-ებს შესაძლებლობას
აძლევდა, რომ სწრაფად მიეწოდებინა იარაღი მოკავშირეებისთვის.
უკრაინის პრეზიდენტი, ვოლოდიმირ ზელენსკი ჯო ბაიდენის ნაბიჯს
ისტორიულს უწოდებს და მადლობას უხდის აშშ-ის პრეზიდენტს.
„მადლობელი ვარ აშშ-ის პრეზიდენტ ბაიდენისა და ამერიკელი ხალხის,
ჩვენი თავისუფლებისა და მომავლისთვის ბრძოლაში უკრაინის
მხარდაჭერისთვის. "ლენდ-ლიზის" შესახებ კანონის ხელმოწერა ისტორიული
ნაბიჯია. დარწმუნებული ვარ, ისევ ერთად გავიმარჯვებთ და ჩვენ დავიცავთ
დემოკრატიას უკრაინასა და ევროპაში, როგორც 77 წლის წინ", - წერს
ზელენსკი "ტვიტერზე".
მასალის გამოყენების პირობები