დღეს, 9 ივნისს, ევროპარლამენტმა „საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუციას“ კენჭი უყარა.

აღსანიშნავია, რომ რეზოლუციაში შევიდა „ევროპის სახალხო პარტიის (EPP), “ევროპის კონსერვატორებისა და რეფორმატორების“ (ECR) და „განაახლე ევროპის“ (Renew Europe) შესწორებები.
ერთ-ერთი შესწორება, რომელიც „განაახლე ევროპას“ ეკუთვნის, ევროპარლამენტს საქართველოს ყოფილი პრემიერ-მინისტრისთვის, ბიძინა ივანიშვილისთვის მიზანმიმართული სანქციების დაწესებისკენ მოუწოდებს.

რეზოლუციაში შესულ შესწორებაში ვკითხულობთ, რომ ევროპარლამენტი შეშფოთებულია „იმ დესტრუქციული როლის გამო, რომელსაც ერთპიროვნული ოლიგარქი, ბიძინა ივანიშვილი თამაშობს ქართულ პოლიტიკასა და ეკონომიკაში“. ასევე შეშფოთებას გამოთქვამს „მთავრობასა და მის გადაწყვეტილებებზე [ბიძინა ივანიშვილის] გავლენის გამო, მათ შორის, ჟურნალისტებისა და პოლიტიკური ოპონენტების პოლიტიკურ დევნასთან დაკავშირებით“.

შესწორებაში ასევე ხაზგასმულია, ბიძინა ივანიშვილის კავშირი კრემლთან, რაც „საქართველოს ამჟამინდელი მთავრობის რუსეთის წინააღმდეგ დაწესებული სანქციების მიმართ არსებულ დამოკიდებულებას განსაზღვრავს“.

ევროპარლამენტმა დამატების ორივე ნაწილი მიიღო. ბიძინა ივანიშვილისთვის სანქციების დაწესება 308 ხმით, 218-ის წინააღმდეგ, დამტკიცდა.