დღეს, 4 საარჩევნო უბანზე საქართველოს პარლამენტის არჩევნების
მაჟორიტარული საარჩევნო სისტემით განმეორებითი კენჭისყრა იმართება.
განმეორებითი კენჭისყრა ზუგდიდის მუნიციპალიტეტის სოფელ ჯიხაშკარის ორ
და სოფელ განმუხურის ერთ უბანზე (№66.67.38, №66.67.79 და
№66.67.108), ასევე მარნეულის მუნიციპალიტეტის სოფელ ყიზილაჯლოს ერთ
საარჩევნო უბანზე (№36.22.48) მიმდინარეობს. ზუგდიდის მაჟორიტარულ
საარჩევნო ოლქში აღნიშნულ 3 საარჩევნო უბანზე, ასევე იმართება
ზუგდიდის მუნიციპალიტეტის გამგებლის რიგგარეშე არჩევნების
განმეორებითი კენჭისყრა. (შესაბამისად, ამომრჩევლები ზუგდიდის
მუნიციპალიტეტის საარჩევნო უბნებზე მიიღებენ 2-2 ბიულეტენს, ხოლო
მარნეულში - ერთს).
როგორც ცესკოში გამართულ საინფორმაციო ბრიფინგზე ცესკოს სპიკერმა ანა
მიქელაძემ ჟურნალისტებს განუცხადა, ყველა საარჩევნო უბანი
ამომრჩევლისთვის დილის 8:00 სთ-დან გაიხსნა და ხმის მიცემის პროცესი
მშვიდ და ყველასათვის ხელმისაწვდომ გარემოში მიმდინარეობს. მარნეულის
მუნიციპალიტეტის №48-ე საარჩევნო უბანზე რეგისტრირებულია 1 436 , ხოლო
ზუგდიდის მუნიციპალიტეტის სამივე საარჩევნო უბანზე ჯამში 2 844
ამომრჩეველი. ზუგდიდის მუნიციპალიტეტში საქართველოს პარლამენტის
არჩევნების მაჟორიტარული საარჩევნო სისტემით განმეორებით კენჭისყრაში
მონაწილეობას იღებს 6 კანდიდატი, მარნეულის საარჩევნო ოლქში - 8
კანდიდატი, ხოლო გამგებლის არჩევნების განმეორებით კენჭისყრაში - 4
კანდიდატი.
მასალის გამოყენების პირობები