გურჯაანის მუნიციპალიტეტის გამგეობაში შექმნილმა სპეციალურმა კომისიამ, 20 მაისს მოსული სეტყვის შედეგად მიყენებული ზარალი დაითვალა.
დასეტყვილია სოფელი გურჯაანი, ჭანდარი, ძირკოკი, ვეჯინი, კოლაგი, ბაკურციხე, ჩალაუბანი, მელაანი, არაშენდა და ჯიმითი.

-"დასეტყვის პროცენტი სხვადასხვაა, შედარებით ცუდი შედეგია ძირკოკში, ჭანდარსა და ვეჯინში, ზარალი სავარაუდოდ ზოგგან 80%-ზე მეტია, ზოგან  40-50%-ია, ზოგან კი 15-დან 20%-მდე. მთლიანობაში დასეტყვილია 990 ჰექტარი ვენახი და დაახლოებით 95 ჰექტარი კურკოვანი ხილი."-აღნიშნა speqtri.ge-სთან გურჯაანის მუნიციპალიტეტის ქონების მართვის, ეკონომიკური განვითარების, დაგეგმვისა და სტატისტიკის განყოფილების უფროსმა სპეციალისტმა ჯემალ შალაშვილმა.

მისივე ინფორმაციით, მონაცემები კახეთში სახელმწიფო რწმუნებულის - გუბერნატორის ადმინისტრაციას უკვე გადაუგზავნეს.