შინაგან საქმეთა სამინისტროს საგანგებო სიტუაციების მართვის სააგენტოს
ოპერატიული მართვის ცენტრში,საქართველოს მასშტაბით, ძლიერი წვიმის
შედეგად გამოწვეული დატბორვის 17 შეტყობინება დაფიქსირდა.
უწყების ინფორმაციით, სამეგრელო-ზემო სვანეთის (ხობი) და
რაჭა-ლეჩხუმის (ონი) რეგიონებში, ადიდებული მდინარეების, ღელეებისა და
ძლიერი წვიმის გამო, დაიტბორა საცხოვრებელი სახლების პირველი
სართულები და ეზოები. შსს-ს სამაშველო ჯგუფები უწყვეტ რეჟიმში
აგრძელებენ წყლის ამოტუმბვის სამუშაოებს და ადგილობრივებს
საყოფაცხოვრებო ნივთების უსაფრთხო ადგილზე გადატანაში ეხმარებიან.
მიმდინარე წლის 7 ივლისს, 18 საათსა და 46 წუთზე, შსს-ს საგანგებო
სიტუაციების მართვის სააგენტოში შევიდა შეტყობინება, რომ მარტვილში,
ადიდებულ მდინარე აბაშისწყალში, 65 წლის მამაკაცი მსხვილფეხა
პირუტყვის გამოსაყვანად შევიდა. სახანძრო-სამაშველო ჯგუფი 18 საათსა
და 50 წუთზე უკვე შემთხვევის ადგილზე იმყოფებოდა. უბედური
შემთხვევიდან ზუსტად 6 წუთში შსს-ს
მაშველებმა და მყვინთავებმა მამაკაცის ცხედარი 10 მეტრის სიღრმიდან
ამოიტანეს.
აღნიშნულ ფაქტთან დაკავშირებით, შსს-ს სამეგრელო-ზემო სვანეთის
პოლიციის დეპარტამენტის მარტვილის რაიონულ სამმართველოში გამოძიება
სსკ-ს 115-ე მუხლით მიმდინარეობს.
მასალის გამოყენების პირობები