საზოგადოება
2020 წელს საგზაო პროექტებისთვის ერთ მილიარდზე მეტი დაიხარჯება
საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, 2020 წელს რეგიონულ და მთის გზის პროექტებზე მნიშვნელოვანი თანხა დაიხარჯება.


უწყების ინფორმაციით, მომავალ წელს, აქტიური სამშენებლო სამუშაოები გაგრძელდება რიკოთის საუღელტეხილო გზის ოთხივე ლოტზე და დაიწყება ქვეშეთი-კობის მასშტაბური პროექტი, სადაც ხელშეკრულება ორივე ლოტზე უკვე გაფორმებულია. 2020 წლის ივლისში დასრულდება ხაშურის შემოვლითი 13 კმ-იანი ოთხზოლიანი ცემენტ-ბეტონის მაგისტრალური გზა, ასევე სამტრედია-გრიგოლეთის მე-2, 18 კმ-იანი მონაკვეთის მშენებლობა, ხოლო მოძრაობა გაიხსნება 14-კილომეტრიან მონაკვეთზე.

ასევე იგეგმება ქუთაისის შემოვლითი-სამტრედიის 200 მილიონი ლარის ღირებულების მაგისტრალური, 41 კმ-იანი ახალი 2 ზოლის მშენებლობა, რაც ამ მიმართულებით ორმხრივ უასაფრთხო გადაადგილებას უზრუნველყოფს და ამასთანავე მოძრაობას განტვირთავს ქალაქ ქუთასში.

ჩქაროსნული მაგისტრალების გარდა, 2020 წელს, საერთო ჯამში დაგეგმილია 600 კმ-მდე შიდა გზების რეაბილიტაცია და პერიოდული შეკეთება. ადგილობრივი თვითმმართველობის მხარდაჭერის პროგრამის ფარგლებში ზუგდიდში, ქუთაისში, ფოთში, ხობში, ნინოწმინდაში, ლაგოდეხსა და სხვა მუნიციპალიტეტებში გათვალისწინებულია ინფრასტრუქტურული პროექტების განხორციელება, ჯამური ღირებულებით 150 მილიონი ლარი.

მიმდინარე წელს, საავტომობილო გზების დეპარტამენტის ბიუჯეტი 1 302 მილიონი ლარის ოდენობით განისაზღვრა, რაც 3.5-ჯერ აღემატება 2012 წლის ბიუჯეტს, ხოლო 8 %-ით მეტია წინა წლის მაჩვენებელთან მიმართებაში.

| Print |
FaceBook Twitter Google