სპეციალური საჭიროების მქონე ბავშვების ოჯახებს საკურორტი ვაუჩერები საგარეჯოს მუნიციპალიტეტის მერმა, ავთანდილ გულიკაშვილმა, მოადგილესთან, გიორგი ლალიაშვილთან და ჯანდაცვისა და სოციალური სამსახურის ხელმძღანელთან ერთად გადასცა.
„ჩემთვის მნიშვნელოვანია, რომ ყოველ ზაფხულს ამ ოჯახებმა შეძლონ შვილებისთვის გარემოს შეცვლა. თითოეული მათგანი ადგილობრივი თვითმართველობის მხრიდან უნდა გრძნობდეს ზრუნვასა და მხარდაჭერას. სწორედ ამ მიზნით, გადავწყვიტე, რომ პირადად შევხვედროდი მშობლებს და ეს დროული და საჭირო საჩუქარი გადამეცა. ჩვენ აქტიურად ვაგრძელებთ მუშაობას მოწყვლად ჯგუფებთან. მუნიციპალიტეტის მერიის მხარდაჭერით, შშმ პირების საზოგადოებასთან ინტეგრაციის მიზნით, მსგავსი აქციები რეგულარულად ჩატარდება.“- განაცხადა ავთანდილ გულიკაშვილმა

როგორც ცნობილია, სერვისის მიწოდებისთვის ასანაზღაურებელი თანხა, არ უნდა აღემატებოდეს საკურორტო მომსახურების ღირებულებას.

ცნობისთვის, საგარეჯოს მუნიციპალიტეტის მერიის ჯანდაცვისა და სოციალური სამსახურის პროგრამის მიხედვით, სპეციალური საჭიროების მქონე ბავშვთა და 18 წლამდე მოზარდების სანატორიულ-კურორტული და ბალნეოლოგიური მომსახურება ფინანსდება.დახმარების მიმღები ოჯახი რეგისტრირებული უნდა იყოს საგარეჯოს მუნიციპალიტეტის ტერიტორიაზე და გააჩნდეს სსიპ სოციალური მომსახურების სააგენტოს მიერ მინიჭებული სარეიტინგო ქულა 120 000-ის ჩათვლით. პროგრამის მოსარგებლეებზე ერთი კალენდარული წლის განმავლობაში გაიცემა ერთი დახმარება.