„შედეგების ოქმებში ხარვეზებმა, საარჩევნო უბნებზე ან მის გარეთ შესაძლო დაშინების თაობაზე გავრცელებულმა ინფორმაციამ, შედეგების დაგვიანებულმა გამოქვეყნებამ და წინასაარჩევნოდ ძალაუფლების ბოროტად გამოყენების მუდმივმა განცდამ 2020 წლის 31 ოქტომბრის საპარლამენტო არჩევნებისთვის საკანონმდებლო ბაზის და ადმინისტრაციული პროცედურების მნიშვნელოვანი გაუმჯობესებები გადაფარა,“ - აღნიშნულია საპარლამენტო არჩევების შესახებ ეროვნულ დემოკრატიული ინსტიტუტის (NDI) მიერ მომზადებულ წინაწარ ანგარიშში.

გურჯაანში პარტია „ლელო საქართველოსთვის“ შტაბის ხელმძღვანელმა, გიორგი ედიშერაშვილმა ბრიფინგი გამართა, სადაც არჩევნების შედეგები შეაჯამა და წინასაარჩევნო ზეწოლებზეც ისაუბრა.

31 ოქტომბერს საპარლამენტო არჩევნების გარდა თელავში საკრებულოს შუალედური არჩევნებიც გაიმართა. დეპუტატს კისისხევის 2 და ნასამხრალის 1 უბნის ამომრჩევლები ირჩევდნენ.

„2020 წლის 31 ოქტომბრის საპარლამენტო არჩევნების დღემ მნიშვნელოვანი ხარვეზებით ჩაიარა კენჭისყრის დღის ყველა ეტაპზე. დღის განმავლობაში არსებული დაძაბული ატმოსფერო გავლენას ახდენდა როგორც ამომრჩევლის ქცევაზე, ისე თავად პროცესის მონიტორინგზე. ძალადობა და ამომრჩევლის ნების თავისუფალი გამოვლინების მიმართულებით დაფიქსირებული პრობლემები გუშინდელი დღის ერთ-ერთი მთავარი მახასიათებელი იყო,“ - აღნიშნულია ორგანიზაციის მიერ გავრცელებულ ინფორმაციაში.

„სამართლიანმა არჩევნებმა“ ხმის დათვლის პროცესის შეფასება და არჩევნების დღის საბოლოო შედეგები გამოაქვეყნა.

ამ დროის მონაცემებით, 3847 საარჩევნო უბნიდან, 3130 უბნის მონაცემები ცნობილია.

კახეთის ორივე მაჟორიტარულ ოლქში ამ დროის მონაცემებით ქართული ოცნების კანდიდატი ლიდერობს, თუმცა, თელავი, ახმეტა, ყვარელი, ლაგოდეხის ოლქში
, არსებული შედეგების მიხედვით, მეორე ტურია მოსალოდნელი.

ამ წუთებში გაიმართა ცესკო-ს თავმჯდომარის, თამარ ჟვანიას ბრიფინგი, რომელმაც გამოაცხადა 2252 უბანზე დათვლილი ხმების წინასწარი შედეგები.

ამ დროისთვის, ცესკო მე-10 მაჟორიტარული ოლქის 30 უბნის მონაცემებს აქვეყნებს, რომლის შედეგებითაც „ქართული ოცნების“ კანდიდატი ლიდერობს. ირაკლი ქადაგიშვილმა 7256 ხმა დააგროვა, ხოლო გიორგი ბოტკოველმა 6148 ხმა.

ამ დროის მონაცემებით, კახეთის N9 მაჟრიტარულ ოლქში დათვლილია 42 უბანი. ცესკოს მონაცემებით, მათგან 37 უბანზე ლიდერობს ქართული ოცნების კანდიდატი, დავით სონღულაშვილი. მან ამომრჩევლის 7629 ხმა მიიღო, ხოლო 4253 ხმით მეორე ადგილზეა ნაციონალური მოძრაობის კანდიდატი, ლევან ბეჟაშვილი.