სურსათის ეროვნული სააგენტო ყოველწლიურად  ბაზარზე განთავსებული პესტიციდებისა და აგროქიმიკატების კონტროლს აწარმოებს.
მიმდინარე წელს დაგეგმილია 445 ნიმუშის აღება და ლაბორატორიული კვლევა.  ასევე 270-მდე სარეალიზაციო ობიექტის შემოწმება თბილისსა და საქართველოს რეგიონებში.

2015 წელს აღებულია პესტიციდების 170 ნიმუში, რომელშიც 11 სხვადასხვა სახის დარღვევა გამოვლინდა. სააგენტოს მიერ კონტროლის გააქტიურების შედეგად პესტიციდების სარეალიზაციო ობიექტებში მდგომარეობა გაუმჯობესდა. გასულ წელს არარეგისტრირებული ქიმიკატებით ვაჭრობის ფაქტი არ გამოვლენილა, ქიმიკატების ტარა მარკირებულია ქართულ ენაზე, რეალიზაცია ხდება დაფასოებული სახით, რაც ამცირებს ფალსიფიცირების რისკს.

არარეგისტრირებული, ფალსიფიცირებული, ვადაგასული, გამოსაყენებლად უვარგისად მიჩნეული აგროქიმიკატი ან პესტიციდი სერიოზული ზიანის მომტანია როგორც სოფლის მეურნეობისათვის, ასევე ადამიანისა და გარემოსათვის. ხარისხიანი და უვნებელი მოსავლის მისაღებად მნიშვნელოვანია არაორგანიზებული რეალიზაციის ფაქტების აღკვეთა, მცენარეთა დაცვის საშუალებების ბაზარზე განთავსებისა და რეალიზაციის პირობების რეგულირება, სანიტარიული ნორმები და შენახვის პირობები, რასაც სურსათის ეროვნული სააგენტოს ფიტოსანიტარიის დეპარტამენტი მიზნობრივი პროგრამის ფარგლებში ყოველწლიურად ახორციელებს.

აღნიშნული ღონისძიებები იცავს ბაზარს ფალსიფიცირებული, მოძველებული და უხარისხო პრეპარატებისაგან, რაც მომხმარებელთა ინტერესების დაცვისკენ არის მიმართული. სურსათის ეროვნული სააგენტო მოუწოდებს დაინტერსებულ პირებს, დარღვევის აღმოჩენის შემთხვევაში დაუკავშირდნენ სოფლის მეურნეობის სამინისტროს ერთიან საინფორმაციო სამსახურს. ცხელი ხაზის ნომერია - 247 01 01.