სამ მილიონად რეაბილიტირებული სპორტკომპლექსი, რომელიც დღემდე არ ფუნქციონირებს, გურჯაანის მოსახლეობისთვის კვლავ ინტერესის საგანს წარმოადგენს. აღნიშნული საკითხის თაობაზე სპორტკომპლექსის დირექტორს გია ბარნაბიშვილს რამდენჯერმე დავუკავშირდით. როგორც ერთი კვირის წინ მან ჩვენთან საუბარში განაცხადა, უნდა ჩატარებულიყო თათბირი, სადაც ამ შენობის ბედი გადაწყდებოდა. ერთკვირიანი მოლოდინის შემდეგ თათბირი მუნიციპალიტეტის გამგეობაში ჟურნალისტებისთვის დახურულ გარემოში გაიმართა.

მისი დამთავრების შემდეგ გია ბარნაბიშვილს გავესაუბრეთ, რომელმაც ასეთი კომენტარი გააკეთა: "თქვენც კარგად იცით დღესდღეობით სპორტული კომპლექსი რა მდგომარეობაშია. მართალია აუზი უკვე შეაკეთეს, მაგრამ დღემდე უფუნქციოდაა. ამის შესახებ დღეს გვქონდა საუბარი და გადაწყდა, რომ თბილისიდან ჩამოვა ექსპერტი, შემოწმდება შენობის ყველა დეტალი, რათა კომპლექსი ფუნქციონირებას რომ დაიწყებს, უსაფრთხოების ზომები მაქსიმალურად იყოს დაცული. მხოლოდ ამის შემდეგ ჩაბარდება მიღება-ჩაბარების აქტი," _ გვითხრა მან. მისივე განმარტებით, ეს საკითხები ერთ თვეში მოგვარდება, რის შემდეგაც სპორტული კომპლექსი ექსპლუატაციაში შევა.