პოლიციის დაუმორჩილებლობისთვის მოქალაქე ზაქარია ბუზალაძე 500 ლარით დააჯარიმეს. პროცესი დღეს გურჯაანის რაიონულ სასამართლოში ადმინისტრაციული სამართალდარღვევის საქმეზე გაიმართა. ზაქარია ბუზალაძეს ბრალი საქართველოს ადმინისტრაციულ სამართალდარღვევათა კოდექსის 173-ე მუხლით წარუდგინეს, რაც პოლიციის დაუმორჩილებლობას გულისხმობს და 50-დან 2000 ლარამდე ჯარიმას ითვალისწინებს. მოსამართლე დავით ნარიმანიშვილმა ბრალმდებელი მხარის (საპატრულო პოლიციის) ვიდეოჩანაწერი ნახა, სადაც ნათლად ჩანდა, რომ საპატრულო პოლიციის თანამშრომლები ზაქარია ბუზალაძეს დაკავებას ცდილობდნენ, მოქალაქე კი მათ აგინებდა და წინააღმდეგობას უწევდა. პროცესის დასრულების შემდეგ, ზაქარია ბუზალაძემ განაცხადა, რომ ვიდეოჩანაწერი დამონტაჟებული იყო. ბრალდებულის თქმით, ის აფექტის მდგომარეობამდე საპატრულო პოლიციის თანამშრომლებმა მიიყვანეს, რის ამსახველი კადრებიც სასამართლოს სრულად არ წარუდგინეს. შეგახსენებთ, რომ კრივის მასწავლებელი ზაქარია ბუზალაძე 25 მარტს პოლიციის თანამშრომლება გურჯაანში, სანაპიროს ქუჩაზე გააჩერეს და ჯერ ღვედის გამოუყენებლობის, შემდეგ კი მობილურ ტელეფონზე საუბრისთვის დაჯარიმებას უპირებდნენ. ბუზალაძემ მათ ამის საშუალება არ მისცა, რადგან მიაჩნდა, რომ უსამართლოდ ექცეოდნენ. პოლიციელებმა კი მისი დაკავება განიზრახეს. ზაქარია ბუზალაძემ საპატრულო ეკიპაჟს წინააღმდეგობა გაუწია.