საქართველოს მოფარიკავეთა ნაკრებმა ევროპის გუნდური თასის გათამაშების ეტაპზე მესამე ადგილი დაიკავა.
მოხმალავეთა შეჯიბრებას, რომელშიც 7 ქვეყნის 8 გუნდი მონაწილეობდა, იტალიის პადოვამ უმასპინძლა.

სანდრო და ბექა ბაზაძეები, მიხეილ მარდალეიშვილი, ნიკა შენგელია - ასეთი იყო საქართველოს ნაკრების შემადგენლობა, რომლის მთავარი მწვრთნელი მერაბ ბაზაძე გახლდათ. პადოვაში იმყოფებოდა ფარიკაობის ფედერაციის პირველი ვიცე-პრეზიდენტი, საერთაშორისო არბიტრი ზაზა მჭედლიძეც.

ქართველმა მოფარიკავეებმა ჯგუფში სამივე შეხვედრა მოიგეს: იტალიის I ნაკრებს 45:39 აჯობეს, საფრანგეთს 45:34, ისრაელს კი 45:23. 1/4-ფინალში მერაბ ბაზაძის გაწვრთნილი გუნდი კვლავ ებრაელ სპორტსმენებს დაუპირისპირდა - 45:24, 1/2-ფინალში ისევ მასპინძელთა პირველ გუნდს შეხვდა - 41:45, მესამე ადგილისთვის კი ქართველებმა იტალიის II ნაკრები დაამარცხეს - 45:28.

პადოვაში მოგებული ბრინჯაოს მედალი ქართველი მოფარიკავეების მეორე წარმატება მიმდინარე წელს თურქეთის ქალაქ სტამბოლში სანდრო ბაზაძემ მსოფლიო თასის ეტაპი მოიგო, ბექა ბაზაძე და მიხეილ მარდალეიშვილი კი იქვე მესამე ადგილზე გავიდნენ.