გურჯაანში ნანა იოსელიანის და გიორგი გიორგაძის სახელობის საჭადრაკო კლუბი გაიხსნა. კლუბში სხვადასხვა ასაკობრივი ჯგუფი იფუნქციონირებს და სწავლა უფასო იქნება.

„აღსანიშნავია, რომ ამ კუთხით რეგიონს დიდი მიღწევები აქვს. ბევრი ჩვენი თანამოქალაქე არის წარმატებული მოჭადრაკე. დარწმუნებული ვარ, რომ მომავალში ჩვენ გვეყოლება არა მარტო საქართველოს, არამედ მსოფლიოს და ევროპის ჩემპიონები. ცოტა ხნის წინ ასეთი კლუბი სიღნაღის მუნიციპალიტეტშიც გავხსენით. ჩემი როგორც გუბერნატორის სურვილია, სპორტის ეს სახეობა რეგიონში კარგად იყოს განვითარებული. “-აღნიშნა კახეთის გუბერნატორმა ირაკლი შიოლაშვილმა.

ჭადრაკის ფედერაციის პრეზიდენტმა გია გიორგაძემ და ჭადრაკში ოლიმპიურმა ჩემპიონმა ნანა იოსელიანმა ბავშვებთან თითო პარტია ითამაშეს.
„ძალიან მოხარული ვარ, რომ გურჯაანში ასეთი მშვენიერი სკოლა გაიხსნა. იმედი მაქვს აქ აღზრდილები წარმატებებით ბევრჯერ გაახარებენ ქვეყანას.“ - განაცხადა ნანა იოსელიანმა.

კლუბის გახსნას გურჯაანის მუნიციპალიტეტის გამგებელი, საკრებულოს თავმჯდომარე და თვითმმართველობის სხვა წარმომადგენლები ესწრებოდნენ.