"ერთიანმა ნაციონალურმა მოძრაობამ“(ენმ) ადმინისტრაციული სამართალდარღვევის ოქმის შედგენის თაობაზე ცენტრალურ საარჩევნო კომისიას მიმართა.
ენმ განმარტავს, რომ საგარეჯოს მაჟორიტარი კანდიდატის ზურაბ ჭიაბერაშვილის სარეკლამო ბანერი, რომელიც სოფელ პატარძეულის შესასვლელში იყო განთავსებული, 19 სექტემბერს მეორედ ჩამოხიეს.
„ნაციონალური მოძრაობა“ ამ ფაქტის გამოძიებას და იმ პირების პასიხისგებაში მიცემას ითხოვს, ვინც აღნიშნული ქმედება ჩაიდინა.
პარტიის ინფორმაციით, მათი ბანერების/ბილბორდების, პლაკატების დაზიანების ფაქტები მთელი ქვეყნის მასშტაბით (მათ შორის სიღნაღსა და გურჯაანში) დაფიქსირდა. ისინი ფიქრობენ, რომ აღნიშნული ქმედებები მთავარი ოპოზიციური ძალის წინააღმდეგ მიზანმიმართულად ხორციელდება.  ცენტრალურმა საარჩევნო კომისიამ აღნიშნული ფაქტი განიხილა და რეაგირებისთვის საგარეჯოს მუნიციპალიტეტის გამგეობას გადაუგზავნა.
საარჩევნო კოდექსის 46-ე მუხლის 7¹ მუხლის თანახმად,  სააგიტაციო მასალის ჩამოხსნა, ჩამოხევა, დაფარვა ან დაზიანება, თუ ის აკრძალულ ადგილას არ არის განთავსებული, დასჯადია.