არასამთავრობო ორგანიზაციამ „ადამიანი კანონი თავისუფლება“ პროექტისთვის ახალგაზრდების შერჩევა დაიწყო. პროექტის „ახალგაზრდული საკრებულო 64 მუნიციპალიტეტში“ ფარგლებში ახალგაზრდები საქართველოს ყველა მუნიციპალიტეტში შეირჩევიან. რესურსცენტრებთან მჭირდო თანამშრომლობის საფუძველზე მოსწავლეებს, რომლებიც არიან X, XI ან XII კლასებში და აქვთ მაღალი აკადემიური მოსწრება, ჩაუტარდებათ ტესტირება და მიეცემათ შანსი გახდნენ „ახალგაზრდული საკრებულოს“ წევრები. "პროექტის „ახალგაზრდული საკრებულო 64 მუნიციპალიტეტში“ საშუალებით უამრავი განათლებული და ენერგიული ახალგაზრდა გამოიკვეთა. თითქმის ყველა მუნიციპალიტეტში მათ შეძლეს საკუთარი თავის წარმოჩენა და დამტკიცება იმისა, რომ მათში დიდი პოტენციალია. ჩვენს ორგანიზაციას ნამდვილად ეამაყება, რომ აღმოაჩინა და ასპარეზი მისცა ასეთ ახალგაზრდებს. დიდი სურვილი გვაქვს, რაც შეიძლება მეტმა ახალგაზრდამ წარმოაჩინოს საკუთარი თავი და ადგილობრივი ხელისუფლების წარმომადგენლებმა თავად დაინახონ თუ რამდენად ნიჭიერი და ენერგიული ახალგაზრდები არიან მათ მუნიციპალიტეტში“ - აღნიშნა ორგანიზაციის თავმჯდომარე გიორგი ჭულუხაძემ. ორგანიზაციაში აცხადებენ, ახალგაზრდული საკრებულოების ხელახალი დაკომპლექტება მოსწავლეების უმაღლეს სასწავლებლებში ჩაბარებამ გამოიწვია.