სიღნაღის მუნიციპალიტეტის, სოფელ ბოდბეში მცხოვრები ბუწაშვილების ოჯახში წლებია, რაც ერთობლივად მუშაობენ და ქმნიან თექაზე შესრულებულ შედევრებს.


საინფორმაციო სააგენტო SPEQTRI.GE-სთან საუბარში, ზურაბ ბუწაშვილი ყვება, რომ ბავშვობაში კარგად ხატავდა, თუმცა მშობლებს სურდათ, ინჟინერი გამოსულიყო. ამის მიუხედავად, იგი უნივერსიტეტში ლექციებს არ ესწრებოდა და ამ დროს ოქრომჭედლობას ეუფლებოდა.

მისთვის ოქრომჭედლობაც მეტად მარტივი და ნაკლებად საინტერესო საქმიანობა აღმოჩნდა, რის გამოც თავისი შესაძლებლობები კიდევ ერთ სფეროში - თექაზე ბარელიეფური ნამუშევრების შექმნაში გამოსცადა. ეს ამბავი კი მაშინ დაიწყო, როდესაც მეუღლემ ერთხელ დახმარება სთხოვა.

„ჩემი მეუღლე და მისი მეგობარი თექაზე მუშაობდნენ სახლში და მივეხმარე პატარა დეტალის, ჭიამაიას გაკეთებაში. მერე ჩემს შვილიშვილს უნდოდა მიშა და მაშა, მულტფილმს უყურებდა ხოლმე, ვცადე [თოჯინის გაკეთება] და გამომივიდა.

ამის შემდეგ, კიდევ უფრო გავართულე და გადავედი პორტრეტებზე. სანამ [ნამუშევარი] თავად არ მომეწონება, იქამდე თავს არ ვანებებ. თანაც ვაძლევ მოცულობას და მოცულობა რომ ეძლევა, უფრო სხვანაირი ჩანს- გამოდის უფრო ბარელიეფის სტილში,“ - გვიყვება ზურაბ ბუწაშვილი.

იგი თექაში აცოცხლებს ისეთი ბუმბერაზი მხატვრების ნამუშევრებს, როგორიცაა რაფაელი, მოდილიანი, ფიროსმანი, თუმცა საავტორო ნამუშევრებიც მრავლად აქვს, მაგალითად, „რძლის პორტრეტი“, „უცოლშვილო კაცი“. თვალშისაცემია აგრეთვე მისი შექმნილი ნაცარქექიას ფიგურა.

„სახეზეც ეტყობა, რომ, რაღაცა მატყუარა, ქლესა, გაიძვერა კაცია. ძალიან მიყვარს, როდესაც ასეთ რამეს ვაღწევ. ეს თავიდან ბოლომდე ჩემი წარმოსახვით არის შექმნილი,“ - ამბობს ზურაბ ბუწაშვილი.

ბუწაშვილების პატარა სახელოსნო ამ დროისთვის, სიღნაღის ცენტრშია განთავსებული. მათი ნამუშევრებით არაერთი ადგილობრივი თუ საერთაშორისო ტურისტი ინტერესდება.

აღსანიშნავია, რომ ზურაბ ბუწაშვილს ნამუშევრებთან განშორება არ უჭირს. მისთვის სასიხარულოა, როდესაც მის შემოქმედებას მნახველი აღტაცებაში მოჰყავს და ნამუშევრის შეძენა სურთ.