საგარეჯოში 14 წლის გოგოს გარდაცვალების საქმესთან დაკავშირებით, საქართველოს პროკურატურამ გოგონას დედას და ბიძას ბრალდება წარუდგინა. საქმეს რუსთავის რუსთავის სასამართლო განიხილავს. პროკურატურა ორივე ბრალდებულის მიმართ პატიმრობის გამოყენებას ითხოვს.

„დღევანდელ სასამართლო პროცესზე, ბრალდების მხარე, ორივე ბრალდებულის მიმართ, როგორც გარდაცვლილის დედის, ასევე ბიძის მიმართ მოითხოვს პატიმრობის გამოყენებას. როგორც მოგეხსენებათ, ჩვენ ასეთი მოთხოვნა სასამართლოს მიმართ უკვე გვქონდა. თავდაპირველად, როგორც ბიძის, ასევე დედის მიმართ ჩვენ მოვითხოვეთ დაკავების ღონისძიებაზე შესაბამისი განჩინების გაცემა, თუმცა, რუსთავის საქალაქო სასამართლომ დედის მიმართ ასეთი შუამდგომლობა არ დააკმაყოფილა, მაგრამ ბრალდების მხარემ პოზიცია არ შეიცვალა და დღევანდელ პროცესზე ბრალდების მხარე კვლავ დაასაბუთებს იმ საფუძვლებს, რატომ უნდა იყოს დედა პატიმრობაში.

დედა იყო პირი, რომელსაც მოეწონა ასაკით უფროსი მამაკაცი, შეძლებული, შესაბამისად, დედა იყო ორგანიზატორი, რომ მომხდარიყო ამ უფროსი ადამიანისა და მისი შვილის ნიშნობა და შემდეგ, როცა უკვე მოტაცებულმა გოგომ მას დაურეკა საშველად და სთხოვა, რომ უკან დაებრუნებინა, სწორედ დედა იყო პირი, ვინც იმ გამტაცებელ ადამიანთან ეს ბავშვი დააბრუნა, - ამბობს ბრალდების მხარე.

შეგახსენებთ, რომ მიმდინარე წლის 6 ოქტომბერს არარეგისტრირებულ ქორწინებაში მყოფ 14 წლის გოგოს ქმარმა ცეცხლსასროლი იარაღიდან სასიკვდილო ჭრილობები მიაყენა და შემთხვევის ადგილიდან მიიმალა.

თუმცა, სამართალდამცველებმა ის ჩატარებული საგამოძიებო და სამძებრო მოქმედებების შედეგად დააკავეს. პოლიციამ ასევე დააკავა გოგონას ბიძაც, რომელსაც დანაშაულის შეუტყობინებლობას ედავებიან.