"გაჭრილი ავტომობილის ნაწილებად გაყიდვა უფრო მომგებიანია" - გიორგი სუპატაშვილი
შემოსავლების სამსახური გერმანელების მხილებულ ავტოდილერების თაღლითურ სქემას უარყოფს.
შემოსავლების სამსახურში აღნიშნავენ, რომ დაჭრილი ავტომობილები საქართველოში ნამდვილად შემოდის, გარკვეული რაოდენობით, თუმცა, მიუხედავად გერმანული გამოძიებისა, უწყებაში აცხადებენ, რომ დაჭრილი ავტომობილები ნაწილებად იყიდება და არა ავტომობილებად.
მათი განმარტებით, ავტომობილი რომელიც შემოდის ქვეყანაში, სპეციალური განბაჟების რეჟიმით შემოდის და ნებისმიერ შემთხვევაში, ის როგორც არ უნდა შეაწებონ მას როგორც ავტომობილს ისე ვეღარ დაარეგისტრირებენ და სააგენტოში ნომერსაც ვერ აიღებენ, რადგან მისი განბაჟების რეჟიმი განსხვავებულია და როგორც ნაწილი ისეა შემოსული.
მათივე თქმით, ასეთი ნაწილები რეალურად შემოდის, საბუთებშიც უწერია, რომ შემოსულია როგორც ნაწილი და შემდგომ ელიავას ბაზრობაზე კიდევ უფრო პატარა ნაწილებად იშლება და იყიდება.
საქართველოში ერთ-ერთი მსხვილი ავტოიმპორტიორი კომპანიის "კავკასუს ავტო იმპორტის" დირექტორი გიორგი სუპატაშვილი შემოსავლების სამსახურის ინფორმაციას ადასტურებს და ამბობს, რომ დაჭრილი ავტომობილების 90%-ით მეორადი ნაწილების ბაზარი მარაგდება. მისი თქმით, საქართველოს კანონმდებლობა არ იძლევა იმისა უფლებას, რომ მთლიანი მანქანა ნაწილებად განბაჟდეს, ან პირიქით - ნაწილები, მთელ ავტომობილად.
"ჩვენ გვყავს დილერები, რომლებიც მანქანას ყიდულობენ ამერიკაში, ჭრიან მანქანას, შემდეგ იშლება და ნაწილებად ჩამოდის. თუ მთლიანად ავტომობილი ჩამოდის, მაშინ მისი ჩამოწერა აქ ხდება და მეორად ნაწილებად ისე იყიდება. მაგალითად ინგლისიდან მარტო ავტომობილის ცხვირები ჩამოდის, წინა ნაწილი, რომელსაც შლიან და ძრავს ცალკე ყიდიან, კარებს ცალკე და ა.შ.", - განმარტავს speqtri.ge-სთან საუბარში გიორგი სუპატაშვილი.
"კავკასუს ავტო იმპორტის" დირექტირი არ გამორიცხავს იმ ფაქტს, რომ შესაძლოა ვიღაც მანქანას აკერებდეს და ისე ყიდდეს, თუმცა მისი განმარტებით ქმედება ეს ფინანსურად ნაკლებად მომგებიანია, ვიდრე ნაწილებად გაყიდვა. "მფლობელისთვის ფინანსურად არ არის მომგებიანი, რომ გაჭრილი მანქანა გადააკეროს და ისე გაყიდოს (ნაწილებად გაყიდვა ბევრად მომგებიანია), ამიტომ ლოგიკურად მისი გაყიდვა მეორად ნაწილებად უფრო აწყობთ. ამასთან გაჭრილი ავტომობილის განბაჟება გაცილებით იაფია. წონა მრავლდება 4.50 ლარზე და იმის დღგ-ს იხდი, ანუ თუ მანქანა არის 1000 კილოიანი, 4 500 ლარის 18%-ს გადაიხდის მფლობელი".
შეგახსენებთ, რომ რამდენიმე დღის წინ მედიაში გავრცელდა გერმანიის “საზოგადოებრივი მაუწყებელის” ჟურნალისტური გამოძიება, რომლის მიხედვითაც, გერმანიიდან საქართველოში სიცოცხლისთვის სახიფათო ავტომობილები ჩამოდის. საქმე ეხება ასობით ავტომობილს, რომლებიც ავარიის შემდეგ გერმანიაში ორ ნაწილად იჭრება და შემდეგ დაჭრილი სახით კონტეინერებით საქართველოში ჩამოდის. საქართველოში მანქანებს ხელახლა აწყობენ და ახლის ფასად ყიდიან.
მასალის გამოყენების პირობები