მთავრობა მუშაობს პროექტზე, რომლის თანახმადაც, თამბაქოზე აქციზის გადასახადი 2015 წლის 1 იანვრიდან კიდევ ერთხელ უნდა გაიზარდოს, რაც თავისთავად სიგარეთზე ფასის მატებას გამოიწვევს. თამბაქოს გაძვირებით მწეველების შემცირება მთავრობის პრიორიტეტია. კანონმდებლები ვერ აკონკრეტებენ აქციზის გაძვირება ზუსტად რამდენით გამოიწვევს ფასის მატებას. „ამ სტრატეგიის ნაწილია, რომ ქვეყანაში შევამციროთ მწეველთა რიცხვი. აქციზის ფასის მატება 2015 წელს მოხდება, მაგრამ ეს რა რაოდენობით იქნება და კონკრეტულად რომელ დღეს, ამის თქმა გამიჭირდება“, _ აცხადებს პარლამენტის ჯანდაცვისა და სოციალურ საკითხთა კომიტეტის თავმჯდომარე დიმიტრი ხუნდაძე. თამბაქოზე ფასის მატებას მოსახლეობა უარყოფითად აფასებს და მთავრობას მწეველების შემცირების სტრატეგიას უწუნებს. Speqtri.ge-მ ამ საკითხთან დაკავშირებით გურჯაანში გამოკითხვა ჩაატარა.