საქართველოში ჩამოსული ტურისტებისთვის ტურისტული გზამკვლევი where.ge-მ შექმნა. გზამკვლევი ტურისტს ნებისმიერი სახის, მისთვის საჭირო ინფორმაციას მიაწვდის.

აღნიშნულის შესახებ where.ge-ს გამომცემელმა, გიორგი შარაშიძემ ისაუბრა.

გიორგი შარაშიძე: ”ეს არის ტურისტული გზამკვლევი, საიდანაც ტურისტი მისთვის საინტერესო თემაზე მიიღებს ინფორმაციას ინგლისურ ენაზე. ჟურნალი ხუთ მიმართულებას აერთიანებს, რომელსაც მოწვეული ავტორი, ტურისტული სფეროს წარმომადგენლები უძღვებიან და თავის გამოცდილებას უზიარებენ, რეკომენდაციას აძლევენ ჩვენს მკითხველებს. ასე რომ, ჟურნალის ყოველ ბლოკში მკითხველი გაეცნობა როგორც მოწვეული ავტორის ნამუშევარს, ასევე ჩვენი ჟურნალისტების მიერ მოპოვებულ, სკრუპულოზურად დამუშავებულ ინფორმაციას, გადამოწმებულ ფაქტებს, როგორც ფასების, ასევე სამუშაო საათების შესახებ და ა.შ. Where.ge ამავე დროს არის ფასდაკლების ბარათების ერთგვარი სისტემა, რომლის პირველი პრეცენდენტი გზამკვლევის პირველივე ნომერთან ერთად შევქმენით. ჟურნალს, თუ მას შეიძენთ (ფასდაკლების ბარათთან ერთად ჟურნალის ღირებულება 10 ლარია), ფასდაკლების 10 ბარათი მოჰყვება. ფაქტობრივად, თითო ბარათი მხოლოდ 1 ლარი ჯდება. თუმცა, უფასო პროდუქტებისა და ბენეფიტების ჯამური მოცულობა, რასაც ტურისტი მიიღებს, 170 ლარის ღირებულების ბონუსია, რომლითაც სხვადასხვა ობიექტში სტუმრობისას ისარგებლებს“- აღნიშნა გიორგი შარაშიძემ.

ჟურნალი სუვენირების მაღაზიებში უკვე იყიდება. ტურისტებს მისი მიღება სასტუმროებსა და კაფე-რესტორნებში უფასოდ, ფასდაკლების ბარათების გარეშე შეუძლიათ.