პირველად ქართული რაგბის ისტორიაში რაგბის მატჩზე უსინათლოთათვის
ტიფლოკომენტატორი (უსინათლოთა და მცირემხედველთათვის მატჩების აუდიო-
აღწერილობითი კომენტირება) იმუშავებს.
ტიფლოკომენტატორი მატჩის მსვლელობისას დეტალურად აღწერს როგორც
მოედანზე, ასევე მთლიანად სტადიონზე მიმდინარე მოვლენებს, რაც
დაეხმარება უსინათლოებს აღქმაში. აპარატურის სიხშირე მთელ სტადიონს
ფარავს, ამდენად უსინათლოთათვის
სპეციალურად ადგილების გამოყოფა საჭირო არაა. სიხშირის მისაღებად
გულშემატკივრებს მხოლოდ მობილური ტელეფონი და ინდივიდუალური
ყურსასმენი ჭირდებათ.
მიხეილ მესხის სტადიონზე, სადაც ხვალ ახალგაზრდა ქართველი
ბორჯღალოსნები ირლანდიელ თანატოლებს მე-9 ადგილისთვის
დაუპირისპირდებიან, პროგრამის ტესტირება გაიმართა. ტესტირებას
სპორტისა და ახალგაზრდობის საქმეთა მინისტრი ტარიელ ხეჩიკაშვილი,
მსოფლიო რაგბისა და საქართველოს რაგბის კავშირის
წარმომადგენლები უსინათლოებთან ერთად დაესწრნენ.
პროექტი სპორტისა და ახალგაზრდობის საქმეთა სამინისტრომ რაგბის
კავშირთან და თბილისის მერიასთან ერთად განახორციელა შშმ პირთა
საზოგადოებაში ინკლუზიის პროგრამის ფარგლებში. პროექტის მხარდამჭერია
ორგანიზაცია „მომავალი იწყება დღეს“.
ტიფლოკომენტირების პროგრამა საქართველოში სპორტისა და ახალგაზრდობის
საქმეთა სამინისტრომ ერთი წლის წინ დანერგა. კომენტატორები უცხოელმა
ტრენერებმა მოამზადეს.
მასალის გამოყენების პირობები