იორმუღანლოს თემის მოსახლეობა დაზიანებული გზების რებილიტაციას ითხოვს. როგორც სოფელ თულარის მაცხოვრებლები ამბობენ, მრავალი წელია სოფელში გზები საფუძვლიანად არ გაკეთებულა და ამიტომ როგორც ტრანსპორტით, ისე ფეხით გადაადგილება უჭირთ. -"ბოლოს გზების გაკეთება არჩევნებამდე დაიწყეს, მაგრამ მარტო ცენტრალურ გზაზე დაყარეს ხრეში, შიდა ქუჩებზე კი არაფერი გაუკეთებიათ. თანაც საქმე შუა გზაზე მიატოვეს, მერე მოვალთ და გავაგრძელებთო, მაგრამ აღარავინ მოსულა. ამ რამდენიმე დღის წინ ახალი რწმუნებული დაგვპირდა, გავაკეთებო. აბა, რა ვიცი, ვნახოთ რას იზამს," _ გვითხრა ფარმა ახმედოვმა. მისივე აზრს იზიარებს ელმან სარიევი, რომელსაც ტრანსპორტი ჰყავს და ამბობს, რომ მოუწესრიგებელ გზებზე მანქანაც ხშირად ზიანდება. -"სად არის აბა გზა, რომ დაგვპირდნენ გავაკეთებთო,როდისღა უნდა გააკეთონ. უკვე წლებია ამ დღეში ვართ და პატრონი არავინ არის. ტრანსპორტითაც კი გვიჭირს გადადგილება, თან ამ გაუბედურებულ გზებზე მანქანაც მალ-მალე ფუჭდება," _ გვითხრა მან. იგეგმება თუ არა იორმუღანლოს თემის სოფლებში გზების გაკეთება, ამ საკითხთან დაკავშირებით საგარეჯოს მუნიციპალიტეტის გამგებელს გიორგი ლოლაძეს ვესაუბრეთ. -"იორმუღანლოს თემის სოფლებში კრებები უკვე ჩავატარეთ. პრიორიტეტებად გზების შეკეთებაც დაასახელეს. ამისთვის ცენტრალური ბიუჯეტიდან უნდა გამოიყოს თანხა და შემდეგ დაიწყება სამუშაოები. პირველ რიგში ცენტრალური გზები გაკეთდება, ხოლო შემდეგში ალბათ საუბნო გზებსაც მივხედავთ," _ ვითხრა მან. იორმუღანლოს თემის მოსახლეობა იმედოვნებს, რომ ამჯერად მაინც ისე მოგვარდება ეს საკითხი, რომ უახლოეს წლებში ამ პრობლემის გადაჭრაზე საუბარი აღარ მოუწევთ. მარინა ბეროშვილი