შინაგან საქმეთა მინისტრი, ვახტანგ გომელაური რუსული კანონის წინააღმდეგ დაგეგმილი აქციის მონაწილეებს აფრთხილებს, რომ ყველა, ვინც პარლამენტის ბლოკირებას შეეცდება, კანონის სრული სიმკაცრითა და სისხლის სამართლის კოდექსის შესაბამისი მუხლით დაისჯება.

პარლამენტის მიმდებარე ტერიტორიაზე დაგეგმილი რუსული კანონის საწინააღმდეგო აქციასთან დაკავშირებული განცხადება შინაგან საქმეთა მინისტრმა საგანგებო ბრიფინგის დროს გააკეთა.

"ჩვენთვის ცნობილია, რომ დაგეგმილია, მომდევნო 2 დღის განმავლობაში შეკრებამ მიიღოს ძალადობრივი და კანონსაწინააღმდეგო ხასიათი, მათ შორის, შეკრების მონაწილეებმა სცადონ პარლამენტის ბლოკირება და შენობაში საქართველოს პარლამენტის წევრებსა და თანამშრომლებს შესვლაში ხელი შეუშალონ, რასთან დაკავშირებითაც გვსურს გავაკეთოთ გამაფრთხილებელი განცხადება.

გასულ წლებში ჩამოყალიბებული იყო არაპროპორციულად ლოიალური პრაქტიკა საქართველოს სისხლის სამართლის კოდექსის 222 მუხლთან მიმართებით, რამაც, როგორც გამოცდილებამ აჩვენა, შესაბამისი დანაშაულის პრევენციაზე უარყოფითი გავლენა იქონია.

შესაბამისად, სახელმწიფო ინტერესებიდან გამომდინარე, თავს ვალდებულად მივიჩნევთ, ეს მუხლი კანონის დამრღვევების მიმართ პროპორციულად ავამოქმედოთ და დანაშაულის ჩადენის შემთხვევაში საქართველოს სისხლის სამართლის კოდექსის 222-ე მუხლი ყოველგვარი გამონაკლისის გარეშე ავამოქმედოთ“, - განაცხადა ვახტანგ გომელაურმა.  





ცნობისთვის, სისხლის სამართლის კოდექსის 222-ე მუხლის ის ნაწილი, რომელზეც გომელაური საუბრობს, გულისხმობს ტელერადიომაუწყებლობის ან კავშირგაბმულობის ანდა სტრატეგიული ან განსაკუთრებული მნიშვნელობის ობიექტის ხელში ჩაგდებას ან ბლოკირებას. ამ დანაშაულის ჩამდენი 4 წლამდე პატიმრობით ისჯება.

რუსული კანონის საწინააღმდეგო აქციაზე მაღალი სტანდარტით მუშაობისკენ პოლიციელებს პრემიერ-მინისტრმა, ირაკლი კობახიძემაც მოუწოდა. 





პრემიერის განცხადებას მალევე გამოეხმაურა საქართველოს პრეზიდენტი სალომე ზურაბიშვილიც. მან ირაკლი კობახიძის განცხადებაში არსებულ მუქარის შემცველ ქვეტექსტს გაუსვა ხაზი და თავის მხრივ, პოლიციელებს შეახსენა, რომ მათი მოვალეობაა კანონისა და ადამიანების დაცვა. 





შეგახსენებთ, რომ დღეს პარლამენტის მიმდებარე ტერიტორიაზე დაგეგმილია ფართომასშტაბიანი საპროტესტო აქცია რუსული კანონის წინააღმდეგ. მომიტინგეები ღამის გათევას გეგმავენ. საპროტესტო აქციას უერთდებიან საქართველოს სხვადასხვა უნივერსიტეტის სტუდენტები. მათი განცხადებით, ისინი არ დაუბრუნდებიან აუდიტორიებს მანამდე, სანამ მთავრობა რუსულ კანონს არ გაიწვევს.

ხვალ, 13 მაისს, რუსული კანონის საკომიტეტო მესამე მოსმენაა ჩანიშნული.