საქართველოს პარლამენტმა რუსული კანონის იმაზე ხისტი ვერსია მიიღო, ვიდრე მისი პირვანდელი ვარიანტი იყო. კანონში ჩამატებულია მუხლები, რომლებიც ფიზიკურ პირებსაც შეეხება.

აღნიშნულ საკითხთან დაკავშირებით, “ახალგაზრდა იურისტთა ასოციაციის” ხელმძღვანელმა ქურდოვანიძემ “ინტერპრესნიუსთან” ისაუბრა. მისი თქმით, ყველაზე საგანგაშოა ის, რომ ეს არის მალულად ჩამატებული მუხლები და მასზე კომიტეტის ფარგლებში მსჯელობა არც ყოფილა. ეს კიდევ ერთი ნიშანია იმისა, თუ როგორ შეიძლება კანონი ხელისუფლებამ თანდათან დაამძიმოს და შეახოს ყველას, ვინც განსხვავებულ პოზიციას დააფიქსირებს.

როგორც ქურდოვანიძე განმარტავს, კანონის პროექტის საბოლოო ვარიანტში ასახული ცვლილების თანახმად, იუსტიციის სამინისტროს უფლება ექნება, ყველა პირს პერსონალური ინფორმაციის წარდგენა მოსთხოვოს და მისი წარუდგენლობისთვის 5 000 ლარით დააჯარიმოს.

ქურდოვანიძის თქმით, კანონპროექტის საბოლოო ვარიანტში დამატებულია მუხლი, რომლის თანახმად, დაკისრებული ჯარიმების თაობაზე მიღებული გადაწყვეტილების სასამართლოში გასაჩივრება ჯარიმების გადახდას არ აჩერებს.

როგორც საია-ს ხელმძღვანელი აცხადებს, ეს იმას ნიშნავს, რომ თუ უკანონოდ დაჯარიმებული პირი სასამართლოში საჩივარს შეიტანს, ვალდებული ხდება, ვიდრე სასამართლო გადაწყვეტილებას მიიღებს, ჯარიმა მაინც გადაიხადოს, რაც სასამართლოში დავას აზრს უკარგავს.

“ჩვენ ეს ცვლილება ახლა ვნახეთ, რაც სრულიად მოულოდნელი იყო. ჩვენ საკომიტეტო განხილვებში ვმონაწილეობდით როგორც პირველი, ასევე მეორე მოსმენით განხილვის დროს. კომიტეტის სხდომებზე აღნიშნულ საკითხზე საუბარი საერთოდ არ ყოფილა. კანონპროექტის ჩასწორებული ვარიანტი არც მეორე მოსმენით საკომიტეტო განხილვაზე ყოფილა წარმოდგენილი - კომიტეტის სხდომაზე ამაზე საუბარი არ იყო!

მას შემდეგ, რაც ეს ცვლილება აღმოვაჩინეთ, ვნახეთ პლენარული სხდომის ჩანაწერი მეორე მოსმენით განხილვისას - როგორც ჩანს, მეორე მოსმენისას, პლენარულ სხდომაზე ჩასწორებული ვერსია წარადგინეს, რადგან პროექტის სესიაზე წარდგენისას წარმდგენი ამბობს, რომ ამგვარი ცვლილებები არის ასახული.

ეს შოკისმომგვრელია, რადგან ასეთ ცვლილებებზე საკომიტეტო განხილვის ფარგლებში საუბარი საერთოდ არ ყოფილა - “ქართული ოცნების“ არც ერთ დეპუტატს ამაზე არაფერი არ უთქვამს.
ეს ჩანაწერები კიდევ უფრო აუარესებს და ამძიმებს კანონპროექტს, რადგან არამხოლოდ იურიდიული, არამედ ფიზიკური პირების პასუხისმგებლობასაც ადგენს.

ფრაზას რასაც პლენარულ სხდომაზე პროექტის წარმდგენი ამბობს, ვერავინ მიაქცევდა ყურადღებას, რადგან მოლოდინი იმისა, რომ პროექტი ჩასწორდებოდა, არავის ჰქონდა, კომიტეტის სხდომაზე "ქართულ ოცნებას" არ უთქვამს, რომ ის რაიმეს შეცვლას აპირებდა.

საბოლოო მოსმენით მიღებული კანონპროექტი უკვე ეხება ფიზიკურ პირებს“, - განაცხადა ნონა ქურდოვანიძემ.

საია-ს ხელმძღვანელის შეფასებით, კანონპროექტში გაკეთებული დამამძიმებელი ჩანაწერები კიდევ უფრო მეტად ქმნის ისეთ რეალობას, რომ პერსონალური მონაცემების დაცვას ძალიან დიდი კითხვის ნიშნის ქვეშ აყენებს.

“ის, რომ პერსონალურ მონაცემთა დაცვის სამსახურს კანონპროექტზე ამ დრომდე შეფასება და განცხადება არ გაუკეთებია, ეს კიდევ ერთი საგანგაშო რამ არის, რადგან ეს ინსტიტუტი თავისი მანდატით არის დამოუკიდებელი. პერსონალური მონაცემების დაცვასთან დაკავშირებულ ასეთ მნიშვნელოვან ცვლილებაზე მისი ვალდებულებაა პოზიცია ჰქონდეს“, - აღნიშნა ქურდოვაძემ.

იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, აღნიშნული საკითხი რადიკალური ოპოზიციის მორიგი სპეკულაციაა.

“ კანონპროექტის ჯერ კიდევ დაინიცირებულ ვერსიაშივე ეწერა, რომ იუსტიციის სამინისტროს უფლება აქვს, კანონის შესაბამისად მოიძიოს საჭირო ინფორმაცია კონკრეტული ორგანიზაციის შემოსავლების/ხარჯების დადგენის მიზნით.

მე-2 მოსმენის დროს, პლენარულ სხდომაზე, სადაც ეს რადიკალებიც სრულად იყვნენ წარმოდგენილნი, მე-9 მუხლში დაზუსტდა შემდეგი:

ამ კანონის შესაბამისად მოთხოვნილი ინფორმაციის წარუდგენლობა გამოიწვევს დაჯარიმებას 5000 ლარის ოდენობით.

ეს ნიშნავს, რომ მხოლოდ ორგანიზაციის შემოსავლების/ხარჯების დადგენის მიზნით არის შესაძლებელი ასეთი ინფორმაციის გამოთხოვა და არა ზოგადად, როგორც რადიკალები ამბობენ, თითქოს ფიზიკური პირის მიერ ფინანსური დეკლარაციის შევსებისა და მისი დარეგისტრირების მიზნით,” - წერს ანრი ოხანაშვილი ფეისბუქ-გვერდზე. 





აღსანიშნავია, რომ “უცხოური გავლენის გამჭვირვალობის შესახებ” კანონის ელექტრონული ვერსია პარლამენტის ვებ-გვერდზე ამ დროისთვის მიუწვდომელია.