გარემოსდაცვითი ზედამხედველობის დეპარტამენტის კახეთის რეგიონული სამმართველოს თანამშრომლებმა გარეული ცხოველით უკანონო ვაჭრობის მორიგი ფაქტი დააფიქსირეს.


მოქალაქის მიმართ, რომელსაც უკანონოდ დატყვევებული გარეული ცხოველის, კერძოდ, ტურის ლეკვის გაყიდვის შესახებ განცხადება ინტერნეტმაღაზია - mymarket.ge-ზე ჰქონდა განთავსებული, ადმინისტრაციული სამართალდარღვევის შესახებ ოქმი შედგა.

მნიშვნელოვანია ის გარემოება, რომ სსდ გარემოსდაცვითი ზედამხედველობის დეპარტამენტსა და ვებგვერდ www.mymarket.ge -ის შორის გაფორმებულია წერილობითი შეთანხმება, რომლის თანახმადაც, ცხოველებითა და დერივატებით ვაჭრობის კატეგორიაში განცხადების გამოქვეყნებამდე, მომხმარებელი ვალდებულია მონიშნოს შემდეგი გრაფა - "ვეთანხმები გარეული ცხოველით ვაჭრობის აკრძალვის წესებს". აღნიშნული ფუნქცია ემსახურება გარემოსდაცვითი დანაშაულის პრევენციასა და გამოვლენას. ინფორმაცია მოიცავს საჯარიმო სანქციების ოდენობის შესახებ გაფრთხილებასაც, შესაბამისად პირი ინფორმირებულია მოსალოდნელი შედეგების შესახებ, თუმცა, ამის მიუხედევად, გარეული ცხოველებით ვაჭრობის შემთხვევები ხშირია.

გარემოსდაცვითი ზედამხედველობის დეპარტამენტი კიდევ ერთხელ შეახსენებს მოქალაქეებს, რომ გარეული ცხოველებით უკანონო ვაჭრობა იკრძალება და მსგავსი ტიპის სამართალდარღვევაზე, საქართველოს ადმინისტრაციულ სამართალდარღვევათა კოდექსის 85-ე მუხლის მე-3 და მე-4 პუნქტების მიხედვით, გათვალისწინებულია საჯარიმო სანქცია 150-დან 1000 ლარამდე.