გურჯაანის მუნიციპალიტეტის საკრებულოს სხდომაზე დეპუტატებმა მხარი დაუჭირეს სოციალური დახმარების პროგრამაში შესატან ცვლილებებს.
სოციალური სამსახურის უფროსის, სოფიო ქუმსიაშვილის განმარტებით, გამარტივდა დოკუმენტების წარდგენა, რომლის მიხედვითაც, მუნიციპალიტეტში რეგისტრირებული ახალშობილის მშობლები ფინანსურ დახმარებას იღებენ ყოველ პირველ, მეორე და შემდგომ შვილზე.

აღსანიშნავია, რომ მერია კერძო დაზღვეულ პირებსაც დაეხმარება.

“სულ არის სამი ცვლილება განსახორციელებელი. ადრე გვეწერა, რომ აუცილებელი იყო წარმოდგენილი ყოფილიყო მშობლის რეგისტრაციის ადგილის შესახებ ცნობა. პერსონალურ მონაცემთა დაცვის შესახებ კანონი გვავალდებულებს, რომ ზედმეტი ინფორმაცია არ მოვითხოვოთ და სწორედ ამასთან დაკავშირებით, რადგან პროგრამაში წერია, რომ დახმარება გაიცემა 0-დან 1 წლამდე ასაკის გურჯაანის მუნიციპალიტეტში რეგისტრირებულ ბავშვზე ამიტომ, საკმარისია მათ წარმოადგინონ ბავშვის რეგისტრაციის შესახებ დოკუმენტი.

მეორე ცვლილება ეს არის კრიზისულ მდგომარეობაში მყოფი ბავშვიანი ოჯახების გადაუდებელი დახმარების ქვეპროგრამაში შესატანი ცვლილება. აქ მთლიანად არის წარმოდგენილი ქვეპროგრამა თუმცა ცვლილება შეეხო მხოლოდ რამდენიმე მუხლს. ყველაზე უფრო მნიშვნელოვანია, რომ ბავშვი შეიძლება არ იყოს რეგისტრირებული გურჯაანის მუნიციპალიტეტში, მაგრამ საჭიროებდეს სასწრაფო გადაუდებელ დახმარებას და ასეთ შემთხვევაში მყისიერი დახმარების გაწევის შესაძლებლობა გვეძლევა თუ ეს ბავშვი ჩვენთან სამი თვის განმავლობაში მაინც ცხოვრობს. რა თქმა უნდა, ამას წარმომადგენელი დაადასტურებს.

მესამე ცვლილება მოიცავს სამედიცინო დახმარების თანადაფინანსების მეექვსე მუხლის პირველი პუნქტიდან მერვე პუნქტის ამოღებას, რაც საშუალებას მოგვცემს, რომ სამედიცინო დახმარების თანადაფინანსება გავუწიოთ ისეთ პირებს, ვისაც კერძო დაზღვევა აქვს იმიტომ, რომ  უფრო ხელშესახები იქნება მათთვის ფინანსური მხარდაჭერა და სამედიცინო სერვისებზე ხელმისაწვდომობა,” - განაცხადა საკრებულოს სხდომაზე სოფიო ქუმსიაშვილმა.