ქალაქ გურჯაანში, კოსტავას ქუჩაზე, მე-4 საჯარო სკოლის მიმდებარე ტერიტორიაზე ტექნიკამ მუშაობა დაიწყო. ცნობილი გახდა, რომ აქ ლევან სამხარაულის სახელობის ექსპერტიზის ეროვნული ბიურო უნდა აშენდეს, რასაც საზოგადოების პროტესტი მოჰყვა. ეკონომიკის სამინისტროს მიწის გასხვისების შესახებ არც ადგილობრივი ხელმძღვანელობისთვის უცნობებია და არც "ტექნიკური სპეციალისტების მომზადების ცენტრისთვის," რომლის მმართველობაშიცაა აღნიშნული ფართი. როგორც მოსახლეობა ამბობს, დასახლებულ პუნქტთან ასეთი დაწესებულების აშენება დაუშვებელია. "ჯერ ერთი, რომ აქვე სკოლაა და ბავშვები ყოველდღე ამ გზაზე დადიან. მეორეც ის, რომ დასახლებული პუნქტია, საცხოვრებელი კორპუსიდან ეს ადგილი პირდაპირ ჩანს. ყოველდღიურად ათასი უბედურება ხდება. როდესაც მიცვალებულს მოიყვანენ აქ უნდა იყოს ჭირისუფლების წივილ-კივილი, რაც ადამიანის ფსიქიკაზე უარყოფითად იმოქმედებს. ხალხი გაჭირვებული ცხოვრების გამო ისედაც განადგურებულია და ესღა გვინდა? რამდენიმე მეტრში ყოფილი საავადმყოფოს იმხელა შენობაა გაპარტახებული, გაარემონტონ და იქ გააკეთონ რაც უნდათ. გასულ კვირას მოვიდნენ, მიწის სინჯი აიღეს, ნიადაგი შეამოწმეს. ყველაფერი ისე გადაწყვიტეს, მოსახლეობას არც ჰკითხეს,"-გვითხრა გურამ ბ-მ. მოსახლეობის პროტესტის კიდევ ერთი მიზეზია ის ფაქტი, რომ ამ უბანში ეს ერთადერთი ადგილია, სადაც ბავშვებს თამაშის და ვარჯიშის საშუალება ჰქონდათ. მათივე თქმით, იმის ნაცვლად, რომ ამ ტერიტორიაზე სპორტული მოედანი მოეწყოთ, მორგს აკეთებენ. "აქ ასეთი შენობის აშენება ყოვლად დაუშვებელია. დასახლებული პუნქტია, სკოლა და კიდევ რამდენიმე სხვა დაწესებულებაა. მერე კიდევ ამ სტადიონზე უბნის ბავშვები ზაფხულობით ბურთს თამაშობენ და ვარჯიშობენ ხოლმე. სხვა მოედანი აქედან რამდენიმე კილომეტრშია, იფიქრა ვინმემ ამაზე?"-გვითხრა ამალია ბოსტოღანაშვილმა. უბნის მაცხოვრებლებმა გურჯაანის მუნიციპალიტეტის გამგებლის სახელზე განცხადება დაწერეს და ხელმოწერების შეგროვებაც დაიწყეს. "მარტო ჩვენ კი არა, სხვა უბნის მაცხოვრებლებიც წინააღმდეგები არიან. თვითონ სახელმწიფო მოხელეების ფანჯრების წინ რომ გააკეთონ ასეთი რამ, მოეწონებათ? ზაფხულში საღამოობით ჩამოვდიოდით და სუფთა ჰაერზე ვისვენებდით, ეხლა ამის საშუალებაც მოგვისპეს. საქონელს არ უშვებდნენ სტადიონზე, რომ წყალსადენია ახლოს და არ შეიძლებაო. მორგის აშენება შეიძლება? როგორც გვითხრეს, თანხები უკვე ჩარიცხულია და პროექტი მზად არის, მაგრამ მოსახლეობა არ შეეგუება ამას და იბრძოლებს, რომ შენობა არ აშენდეს,"-გვითხრა ქალბატონმა, რომელმაც გვარი და სახელი არ დაასახელა. ჩვენს თხოვნაზე, რომ ვინაობა გაემხილა, გვიპასუხა: "როგორ შეიძლება გვარი და სახელი გითხრათ?პერსონალურად ხომ არ გეტყვით? დაწერეთ მთელი უბნის მოსახლეობის სახელით.~ გურჯაანის მუნიციპალიტეტის გამგებლის ემზარ ჯიქურაშვილის თქმით, პროექტისთვის თანხა უკვე გამოყოფილია. `პროექტის შესახებ ჩემთვის რამდენიმე დღის წინ გახდა ცნობილი. ამის თაობაზე უკვე მქონდა საუბარი ექსპერტიზის ბიუროს ხელმძღვანელებთან. პროექტში აღნიშნულია, რომ აქ სამხარაულის სამედიცინო ექსპერტიზის რეგიონული განყოფილება უნდა აშენდეს, ამისთვის თანხა უკვე გამოყოფილია. რაც შეეხება შემდგომ მოქმედებებს, დავსხდებით და ვიმსჯელებთ ბიუროს ხელმძღვანელებთან. გვექნება აზრთა გაცვლა-გამოცვლა და საკითხს რამენაირად შევაჯერებთ,"-გვითხრა მან. აღნიშნულის თაობაზე ლევან სამხარაულის ეროვნული ბიუროს პრესსამსახურს დავუკავშირდით, სადაც განმარტეს, რომ კოსტავას ქუჩაზე ულტრათანამედროვე სტანდარტების შესაბამისი, სრული მატერიალურ-ტექნიკური ბაზით აღჭურვილი ეროვნული ბიუროს სამედიცინო ექსპერტიზის დეპარტამენტი აშენდება, სადაც სხვა გამოკვლევებთან ერთად, გარდაცვლილთა ექსპერტიზაც მოხდება. "სპექტრის" ინფორმაციით, დოსააფის შენობა და სტადიონი, სადაც ექსპერტიზის ბიურო უნდა აშენდეს, ეკონომიკის სამინისტროს ბალანსზეა. ამ დროისთვის კი შპს "ტექნიკური სპეციალისტების მომზადების ცენტრის" მმართველობაშია. თუმცა, როგორც ჩვენთან საუბარში ცენტრის დირექტორმა თამაზ მანდარიამ განმარტა, აღნიშნული ფართი მათი საკუთრებაა და გასხვისების შესახებ არავის უცნობებია. "დოსააფის შენობა და 12 ათასი კვადრატული მიწის ნაკვეთი ჩვენს ბალანსზეა და ჩვენს საკუთრებას წარმოადგენს. მშენებლობის დაწყების შესახებ არავის არაფერი უცნობებია. ჯერჯერობით რაღაც საკითხები დასაზუსტებელია. მომდევნო კვირაში საკითხს აუცილებლად გავარკვევთ, მივმართავთ ეკონომიკის სამინისტროს და თუ გაირკვევა, რომ ჩვენი დასტურის გარეშე კეთდება რამე, ვინც ნებართვა გასცა, იმას პასუხს მოვთხოვთ. თუ ჩვენს საზღვრებს გარეთ კეთდება, მაშინ წინააღმდეგი არ წავალ. მომიწევს ყველაფრის ადგილზე გარკვევა,"-გვითხრა მან. "სპექტრი" სიტუაციის გასარკვევად ეკონომიკის სამინისტროსაც დაუკავშირდა. როგორც პრესსამსახურში გვითხრეს, დეტალურ ინფორმაციას მოგვიანებით მოგვაწვდიდნენ, თუმცა, ამის შემდეგ ჩვენს სატელეფონო ზარებს აღარ უპასუხეს. მარინა პეტრიაშვილი