"გობელენი ჩემთვის სიყვარულია"- მხატვარ-დიზაინერი გურჯაანიდან [Photo]
თანამედროვეობის შეგრძნება სჭარბობს, თუმცა მის ნამუშევრებს სიძველის
კვალიც ატყვია. ხათუნა ბაბუხაძე 18 წლიდან ხატავს, სახლში მუშაობს და
პატარა, მყუდრო სახელოსნოც აქვე აქვს მოწყობილი.
როგორც თავად ამბობს, ხელოვნებისადმი სიყვარული იმდენად დიდია, რომ
ხანდახან მუშაობაში რამდენიმე ღამე თავზეც კი დასთენებია.
დროთა განმავლობაში გემოვნებასთან ერთად მუზაც იცვლებოდა.
ნამუშევრებში ცივმა ტონალობამ სითბოსკენ გადაინაცვლა. თავის
ქმნილებების გაყიდვა და მათთან განშორება უჭირს. ამ დროს განცდა
ისეთივეა, როდესაც დედა საკუთარ შვილს ტოვებს. დაკავებულია
ხატწერითაც, თუმცა ამას განსაკუთრებული ხასიათი სჭირდება.
„ბოლო გობელენზე ცხრა თვე ვიმუშავე, ზოგჯერ 14 თვეც კი
მიმუშავია. ხალიჩაზე შემიძლია დღისით ვიშრომო, გობელენი ჩემთვის
სიყვარულია. აქ სამუშაოდ ვერ დაჯდები მოვალეობის გამო, ან იმ დროს,
როდესაც განწყობა არ არის. თუ მუზა არ მოვიდა, არაფერი
გამოვა.“
უყვარს პოლ გოგენი, სალვადორ დალი და პაბლო პიკასო, ამიტომ მის
ნამუშევრებში ამ მხატვრების ფერთა გამა სჭარბობს. გასულ წელს წიგნში
„ანთოლოგია“ ისეთ ქართველ მხატვრებთან ერთად მოხვდა, როგორიცაა, ზურა
წერეთელი და მერაბ ბერძენიშვილი. მიმდინარე წელს ლონდონში კატალოგი
გამოიცემა, რომლის ფურცლებიც ხათუნას შემოქმედებასაც დაიტევს.
აქტიურად მონაწილეობს საქართველოსა და საზღვრებს გარეთ გამართულ
გამოფენაზე. მიმდინარე წლის სექტემბერში დაესწრო სამიტს, სადაც
რამდენიმე ქვეყნის დიზაინერიც იმყოფებოდა. „მინდა გითხრათ,
რომ ძალიან კმაყოფილი დავრჩი. ჩამოსული იყო მადონას და ლედი გაგას
პირადი დიზაინერი ასად აბადი, რომელმაც ლექცია ჩაგვიტარა. ბატონ გია
ნოდიას ჩემი ნამუშევრები მოეწონა, დაინტერესდა და ჩემთან სოფელ
მუკუზანში, აპირებს ჩამოსვლას. ამ სამიტმა ბევრი რამ მომცა,
თავდაჯერებულობა შემმატა. მსგავსი შეხვედრები კარგია იმისთვის, რომ
ფართო საზოგადოებამ გაგიცნოს.”
ხათუნას სამომავლო გეგმები დიდია, მანამდე კი ნოემბრის თვეში წინ
ლონდონის საერთაშორისო ფესტივალია.
მასალის გამოყენების პირობები