იორმუღანლოს თემის სოფელ ლამბალოს საჯარო სკოლის პრობლემის შესახებ "სპექტრი" იმ დღიდან წერს, რაც ამ სოფელს 2010 წელს პირველად ეწვია. რამდენიმე წელია სასწავლო პროცესი "კერძო სახლებში" მიმდინარეობს. სახლიც პირობითად, თორემ საკლასო ოთახების მონაცვლეობას ბავშვებს მიწური, კედლებჩამონგრეული ოთახები უწევთ. ოთახები, რომლებშიც ყოველთვის ნესტის სუნი დგას და სუსხია. ზამთარში კი ამ სუსხს გაუსაძლისი ყინვა ცვლის, რომელსაც ღუმელი ვერაფერს შველის და თითქმის ისევე ცივა, როგორც გარეთ. პირად საუბრებში პედაგოგები თავადვე აღიარებენ, რომ მათი კლასები ბოსელშია განთავსებული. ექვსი წლის წინ სკოლის დირექციამ გადაწყვეტილება მიიღო, რომ უსაფრთხოების მიზნით სკოლის შენობაში სწავლა შეეწყვიტათ და ალტერნატიული ფართი გამოენახათ. დაახლოებით ორი წელია, რაც საუბარი მიმდინარეობს ახალი სასწავლო დაწესებულების აშენების შესახებ, თუმცა ეს პროცესი ჯერაც არ დაწყებულა. სწორედ ორი წლის წინ მოახდინეს შენობის დემონტაჟიც, სადაც ახლა ნანგრევიბია. მასწავლებლების ნაწილი მიიჩნევს, რომ სასწავლო პროცესის შეჩერების აუცილებლობა არ არსებობდა. შესაძლებელი იყო სარემონტო სამუშაოები პარალერულ რეჟიმში ჩატარებულიყო. მეორე ნაწილი თვლის, რომ სკოლის დემონტაჟი აუცილებელი იყო. თუმცა, იმასაც მიაჩნიათ, რომ ახალი სკოლის მშენებლობის პროცესი დროში ძალიან გაიწელა. -"ლამბალოს სკოლაში უკვე მერამდენე წელია საშინელ პირობებში მიმდინარეობს სწავლება. თქვენც ხედავთ, რა მდგომარეობაა. ოთახებს კედლები არ აქვს. ზამთარში ბავშვებს ძალიან სცივათ. ამის მიუხედავად, სკოლას არ აცდენენ. იქნებ წელს მაინც გვეშველოს და ახალი შენობა აგვიშენონ," _ გვითხრა დაწყებითების პედაგოგმა სიდონია გრძელაშვილმა. ქართული ენა-ლიტერატურის მასწავლებელი ნელი ჯავახიშვილი წლებია, რაც ლამბალოს სკოლაში პედაგოგად მუშაობს. საერთო პრობლემა მასაც აწუხებს. -"სკოლის შენობის დაცლის საკითხი დღის წესრიგში ექვსი წლის წინ დადგა. მას შემდეგ ასეთ პირობებსი გვიწევს სწავლება. ძალიან ცუდი მდგომარეობაა. ორი წლის წინ იყვნენ მოსულები, თითქოს დაიწყო საუბარი იმაზე, რომ სკოლას აგვიშენებდნენ, მაგრამ ჯერაც არაფერი შეცვლილა. ბოლოს ცენტრალური მედიასაშუალებებიც იყვნენ მოსულები. ალბათ ეს "სპექტრის" დამსახურება იყოს, რადგან თქვენი გაზეთი ბოლო დროს ხშირად და აქტიურად აშუქებდა ჩვენს პრობლემას, ახალი მთავრობაც გვპირდება მშენებლობა უახლოეს მომავალში დაიწყებაო. იმედია, მართლაც ასე იქნება," _ გვითხრა ნელი ჯავახიშვილმა. ლამბალოს საჯარო სკოლის დირექორის დავით როსტომაშვილის თქმით კი, განათლების სამინისტრო საქმის კურსშია და სკოლის საკითხი უახლოეს მომავალში გადაიჭრება. -"სკოლის დაცლა და ალტერნატიული ფართის მონახვა ექვსი წლის წინ აუცილებელი იყო, მაშინ დირექტორი მე არ ვიყავი, მაგრამ რაც მაქვს ნანახი, შემიძლია გითხრათ, რომ საძირკველი სავალალო მდგომარეობაში იყო. იქ სწავლის გაგრძელება უსაფრთხო ნამდვილად არ იყო. დღეის მდგომარეობით, განათლების სამინიტრომ ჩვენი გაჭირვების შესახებ დეტალურად იცის. პროექტი უკვე წარდგენილია და ძალიან მალე ტენდერიც გამოცხადდება," _ გვითხრა დავით როსტომაშვილმა. სკოლის დირექცია ვარაუდობს, რომ ახალ სკოლაში გადასვლა 2013-14 სასწავლო წლის მეორე სემესტრიდან იქნება შესაძლებელი. განათლებისა და მეცნიერების სამინისტროს საზოგადოებასთან ურთიერთობის სამსახურის ხელმძღვანელმა თიკო ფეიქრიშვილმა "სპექტრს" განუცხადა, რომ ამ დროისთვის კომისია ლამბალოს სკოლის პროექტს სწავლობს. ეს პროცესი დაახლოებით ერთ თვეში დასრულდება. მისი თქმით, სწორედ ამის შემდეგ განისაზღვრება, თუ რა თანხა დასჭირდება სკოლის მშენებლობას და რომელი კომპანიები მიიღებენ ტენდერში მონაწილეობას. ლანა გულოშვილი მსგავსი სტატიები: ექსკლუზივი. აჟიტირებული განათლების რეფორმა და ბოსელში განთავსებული საჯარო სკოლა 10 წელი სკოლის გარეშე სოფელ ლამბალოს მოსახლეობა ახალი სკოლის მოლოდინში განათლების მინისტრი ლამბალოელებს სკოლის აშენებას დაჰპირდა ფოტოები